Roi tơbăt truh Kơdră ASEAN BAC dôm teh đak găh tơdrong hiong răm yua đơ̆ng ‘mi kial hơbŭt kơ sô̆ 3 păng ‘mi tih, đak lơ̆p pơm ăn dôm năr âu ki tơ̆ dôm dêh char găh tu Việt Nam, Thủ tướng Phạm Minh Chính bơnê Kơdră ASEAN BAC dôm teh đak hlôi vang tơgŭm păng tơgop kŭm hăm Việt Nam hơmet pơ ‘lơ̆ng hiong răm.

Thủ tướng hmach hơiă jơnei đơ̆ng ‘Măng hop akŏm ASEAN BAC ‘măng mă 101 ‘nao pơgơ̆r tơ̆ Hà Nội păng dôm nơ̆r tơlĕch, apĭnh lơ̆m hla ar tơroi tơbăt găh tơdrong jang đơ̆ng ASEAN BAC lơ̆m sơnăm 2024; hơmĕng dôm tơdrong tơm tơgŭm hơdrol mă Jơnŭm tŏk bŏk tơlĕch jang gô tơgop pơtrŭt pran kơtang tơdrong tơplih, chih pơkeh hla ar hơgăt tơdrong jang tơgŭm, pơm hiôk hian mơdro sa păng tơmơ̆t jên jang, tơplih kơsô̆, hơtŏk tơiung kơjăp păng tôm tơdrong đơ̆ng ASEAN, mă loi ‘noh jĭ dôm tơdrong tưk tơiung tŏk ‘nao... Kiơ̆ đơ̆ng noh tơgŭm anih mơdro sa hơmet pơ ‘lơ̆ng mơmat tat păng tơgĕch iŏk đei dôm tơdrong hiôk vă hơtŏk tơiung.