APM Holding ‘noh Grup jang mơdro sa păng tơmơ̆t jên jang lơ̆m plei teh, bơ̆ jang lơ̆m lơ tơdrong jang, hăm chăl sơnăm tơ iung pơjing truh 120 sơnăm kơ ou, grup jang hrei ou hlôi đei hơnih jang tơ̆ 130 teh đak hăm hloh 100.000 ‘nu bơngai jang. Thủ tướng hôn bơnê kơtang găh tơdrong đei lơ kon jên tơmơ̆t jang, kmăi kmŏk ‘lơ̆ng păng tơdrong chĕp pơgơ̆r gơh hơgei adoi nhen bơ̆ jang tơmơ̆t jên jang đơ̆ng Grŭp APM Holding tơ̆ Việt Nam, tơgop lơ̆m tơdrong atŏk tơ iung kơ hơnih jang duk chơ tơmam drăm păng tơdrong jang mŭk drăm kơ Việt Nam. Thủ tướng tơbăt, Việt Nam đei hloh 3.200 km jih đak dơsĭ, lơ̆m găh khul 20 teh đak jang mơdro sa tih lơ̆m apŭng plĕnh teh. Việt Nam tŏk bŏk hơtok kơtang atŏk tơ iung trong nơnăm, lơ̆m ou đei dơnŏk duk păng khul duk đak dơsĭ vă pơm tơjur kon jên jang logistics tok bŏk oei tŏk lơ, pơm hơtŏk kĕ pơjei kơ tơmam drăm păng tơdrong jang mŭk drăm. Thủ tướng athei grŭp jang chă tơchĕng hơlen, vang iung jang lơ̆m dôm tơdrong vă jang hơdăh mă Việt Nam tŏk bŏk krao hơvơn tơmơ̆t jên jang nhen dơnŏk duk Liên Chiểu (Đà Nẵng), dơnŏk duk apŭng plĕnh teh Cần Giờ kơ pơlei tơm Hồ Chí Minh, mĭnh ƀar dơnŏk duk đak dơsĭ tơ̆ tơring găh Tu, Tơring tŏk bŏk păng, Tây Nam Bộ.