Thủ tướng hôn bơnê kơ Quốc vụ khanh kŭm hăm khŭl 19 anih mơdro sa tih kơ UAE lơ̆m dôm tơdrong jang nhen logistics, ŭnh hơyuh, tơmam drăm lơ̆m teh, tơmam sa, jên mong tơmơ̆t jên jang, jên hu, anih mong jên... năm ngôi, bơ̆jang tơ̆ Việt Nam. ‘Nâu jĭ tơdrong hiôk ‘lơ̆ng vă anih mơdro sa  2 păh tơchă dôm tơdrong hiôk jang hơdai lơ̆m dôm tơdrong jang mă 2 păh vang bơngơ̆ truh.

Thủ tướng lăng ‘lơ̆ng dôm tơdrong hơdrin păng hơ yak năm mă 2 păh iŏk đei lơ̆m pơma đam Tơdrong tơchơ̆t Jang hơdai mŭk drăm tôm tơdrong Việt Nam - UAE. Vă tŭn pran hloh dơ̆ng jang hơdai 2 pang, Thủ tướng athei 2 păh hơtŏk loi dơ̆ng pơma dơnuh khŭl rim kơdră, mă loi ‘noh kơdră kơpal; pơm tơdrong hiôk, pơtrŭt dôm anih mơdro sa 2 teh đak jang hơdai, tơmơ̆t jên jang, tơchĕng hơlen, set hơlen tơ jur thuê̆ hăm 1,2 tơmam vă hơtŏk dôm tơdrong pran gơh tơmơ̆t thim ăn băl đơ̆ng 2 mŭk drăm; jăh bơ̆jang kiơ̆ ‘lơ̆ng tơdrong hơgăt hơnhăk jên mơdro sa 2 pang iŏk đei 10 ti USD.