Tơ̆ jơ tơƀơ̆p, Thủ tướng Phạm Minh Chính hlôi hmach chơt hơ iă kơ Lào pơgơ̆r jơnei Hop akŏm hơnih jang Khul đak kroong Mekong apŭng plĕnh teh ‘măng mă 4, đơ̆ng noh tơgop atok kơtang hơnăp jang păng hơnih dơ̆ng kơ Lào lơ̆m tơring.

Ƀar Thủ tướng chơt hơ iă păng hôn bơnê tơdrong atŏk tơ iung ‘lơ̆ng hơ iă kơ tơgoăt tơgoăl jang hơdoi gĭt kăl, tơgoăt tơgpoăl jang hơdoi tôm tong Việt Nam – Lào lơ̆m rim tơdrong ƀar teh đak khei năr au ki. Mă kăl, jang hơdoi mơdro sa jing trong hơ iă hlŏh hăm tĕch mơdro dih băl iŏk đei lơ̆m sơnăm 2022 ‘nŏh hloh 1ti 700 triu USD, tŏk hloh 24% pơteng hăm sơnăm 2021. Ƀar păh drơ̆ng mĭnh nơ̆r hơdrin hlŏh dơ̆ng tơlech jang kiơ̆ Drơ̆ng mĭnh nơ̆r jang hơdoi Việt – Lào jăl jang 2021-2030, Tơdrong tơchơ̆t jang hơdoi dih băl Việt-Lào 2021-2023 păng rim tơdrong drơ̆ng mĭnh nơ̆r, trong vă jang hơdoi hlôi kĭ pơkăp lơ̆m rim tơdrong; hơnơ̆ng iung jang hơdoi vei lăng sơđơ̆ng dơ̆ng kơjăp tơpôl; atŏk kơtang jang hơdoi vei lăng sơđơ̆ng teh đak. Ƀar păh jei drơ̆ng mĭnh nơ̆r hơnơ̆ng atŏk kơtang jang hơdoi mŭk drăm; tơgŭm djru dih băl hơmet pơ ‘lơ̆ng đơ̆ng rongh jĭ hơbuh, tơ iung pơjing mŭk drăm pơm tơm kơdih, tơklep hăm vang mơ̆t hơdoi lơ̆m apŭng plĕnh teh ‘lơ̆ng hơ iă păng jơnei hloh dơ̆ng.