Anih vei lăng đak krong Mê Công apŭng plenh tĕh đei 04 tĕh đak vang jang ‘nŏh Campuchia, Lào, Thái Lan păng Việt Nam; jĭ trong jang hơdoi Mê Công đunh hlŏh păng jing 1 trong jang ‘moi kiơ̆ tơdrong tơchơ̆t apŭng plenh tĕh vă pơih trong jang hơdoi atŏk tơiung pran kơjăp, iŏk yoa, vei lăng năng tông đak păng dôm tơmam drăm đei ƀơm truh tơ̆ tơring. ‘Nâu jĭ hop akŏm tơ̆ tơring tôch gĭt kăl vă atok tơiung tơdrong rơngei păng tơtă đei yoa ngăl vă jang tŏk pran kơjăp tơ̆ tơring đak krong Mê Công.

Hop akŏm tih Anih vei lăng đak krong Mê Công đei hơnăn “Tơplih ‘nao păng jang hơdoi vă vei lăng sơđơ̆ng ‘lơ̆ng kơtu đak păng tơdrong jang tŏk pran kơjăp tơ̆ tơring đak krong Mê Công”. ‘Nâu jĭ 1 tơdrong gĭt kăl, chih tơbăt tơdrong jang hơdoi Mê Công đei nơ̆r pơkăp păng tơgŭm tôch pơnĕh đơ̆ng kuan tih hlŏh kơ Khul kơdră dôm tĕh đak jang lơ̆m anih âu, păng dôm pang đei ƀơm truh ăn tơdrong jang atŏk tơiung pran kơjăp tơ̆ tơring đak krong Mê Công. Tơ̆ hop akŏm, Thủ tướng dôm tĕh đak vă pơma nuh găh dôm tơdrong mơmat tat, pơlong nol kŭm nhen dôm tơdrong ‘lơ̆ng hăm tơdrong jang tŏk đơ̆ng tơring Mê Công păng vă drơ̆ng nơ̆r ăn tơdrong Tơchơ̆t atŭm đơ̆ng Hop akŏm – Nơ̆r tơchơ̆t Viêng Chăn.