Iung pơma tơ̆ pơm lêh, Thủ tướng pơma hơdăh, Pơdă hlôi jơnei ‘lơ̆ng hơ iă hloh, tơƀôh hơdăh jơhngơm đon tơgoăt mĭnh nơ̆r ƀơ̆r đon hơdrĕch hơdrung-Tơm a la chă pơjing đei jơhngơ̆m đon gơh hơgei, nuih mơng păng hơpơi ‘meh vă kơtang kơ hơdrĕch hơdrung Việt Nam lơ̆m chăl ‘nao. Hăm tơdrong pơm tơƀôh dơ̆ng lơ̆m chăl sơnăm sơ̆ ki, ‘Măng pơdă jĭ um rup tơƀôh hơdăh dôm tơdrong jơnei kĕch mang hloh 80 sơnăm, tơklep kơjăp ‘măng iung jang pơm tơm kơdih hơdrĕch hơdrung hăm tơ iung pơjing chủ nghĩa xã hội. ‘Nou jĭ tơƀôh hơdăh găh tơdrong trŏ lăp pơm tơm kơdih hơdrĕch hơdrung tơklep kơjăp hăm chủ nghĩa xã hội, adoi pơm hơtŏk jơhngơ̆m đon hơgei Việt Nam. Thủ tướng sơkơ̆t hơdăh, ‘Măng pơdă “80 sơnăm-Chăl sơnăm Pơm tơm kơdih, Rơngei hiôk hian, Hơnŭk hơnoa” pôk pơ ư jơhngơ̆m nuih, jơhngơ̆m đon hơgei, tơchăr hơgei kơ kon bơngai Việt Nam, pơm hơtŏk jơhngơ̆m đon ‘mêm kơ eng teh đak păng jơhngơ̆m đon lui kơjăp đơ̆ng Kon pơlei hăm Đảng, Teh đak păng tơdrong jang tơplih ‘nao.