Iung pơma tơ̆ jơ pơm lêh, atŭm hăm jang kiơ̆ rim trong tơlĕch jang ƀơ̆t măt, Thủ tướng Phạm Minh Chính athei, Vietcombank kăl hơlen mă hơdăh trong vă jang păng rim tơdrong jang atŏk tơ iung păh ai păng đunh đai trŏ lăp hăm Trong jang atŏk tơ iung hơnih jang Mong jên truh sơnăm 2025, lăng trŭh sơnăm 2030 păng trong atŏk tơ iung atŭm kơ rim hơnih mong jên lơ̆m tơring păng lơ̆m apŭng plĕnh teh, mă kăl ‘nŏh tơdrong atŏk kơtang chĕp pơgơ̆r, jên hu păng bơ̆ jang mơdro sa jơnei, tơplih kơsô̆ păng jang kiơ̆ kmăi kmŏk hơnih jang mong jên. 

Thủ tướng ‘meh vă păng lui akhan, Vietcombank gô hơnơ̆ng atŏk kơtang tơdrong joăt joe ‘lơ̆ng hơ iă păng iŏk đei jơnei hlôi iŏk đei, hơdrin yak hloh tơnap tap, tơdrong long; hơnơ̆ng tơplih ‘nao tôm tong, atŏk bơ̆ jang iŏk đei jơnei, kĕ pơjei, vei kơjăp păng hơmet pơ ‘lơ̆ng hơnih dơ̆ng ‘nŏh Hơnih mong jên kơsô̆ 1 tơ̆ Việt Nam păng roi năr roi kơjăp iăp kơtang lơ̆m tơring păng lơ̆m apŭng plĕnh teh.