Lơ̆m jơ ‘năr chơt hơiă kŭm hăm lơ̆m teh đak tơbăt 80 sơnăm kach mang Khei 8 păng Quốc khánh 2/9, pơgê brei (25/8), Anih tơm Tư pháp pơgơ̆r Lêh tơbăt 80 sơnăm Năr joăt joe anih jang Tư pháp Việt Nam (28/8) păng Hop akŏm pơjei băl ‘mêm kơ teh đak anih jang Tư pháp ‘măng mă 6. Chih iŏk dôm jơnei hlôi iŏk đei đơ̆ng anih jang Tư pháp lơ̆m 80 sơnăm âu ki, tơ̆ jơ pơm lêh Thủ tướng Phạm Minh Chính tang măt kơdră chĕp kơ̆l Đảng, Teh đak pơjao asong Mê đai bơ̆jang mă Mônh ăn kơ Anih tơm Tư Pháp yua jang gơh hơgei hloh lơ̆m tơdrong jang tư pháp, tơgop pơjing păng vei lăng Teh đak Việt Nam XHCN, yua kơ tơdrong tơm kon pơlei pơdrŏng, teh đak pran, kon pơlei pơm tơm, hơtŏ băl, hơgei.

Tơ̆ hơnăp kơnh, Thủ tướng Phạm Minh Chính athei anih jang Tư Pháp akŏm hơmet pơ ‘lơ̆ng dôm tơdrong pơmat tat, tơhlăk tơhlĭn găh trong jang, khôi luơ̆t, pơm ‘lơ̆ng krao hơvơn păng iŏk yua jơnei rim jên jang, pơm tơdrong ‘lơ̆ng ăn teh đak kơjăp yak mơ̆t lơ̆m chăl ‘nao. Thủ tướng lui ngeh hăm tơdrong joăt joe 80 sơnăm anih jang Tư pháp, tơdrong jang tư pháp tơ̆ hơnăp kơnh hơnơ̆ng đei hơyak hơtŏk tơiung ‘nao, tơgop bơ̆jang kiơ̆ jơnei tơdrong jang kach mang kơ Đảng, kơ hơdrĕch hơdrŭng.