Pơgê 9/9, Thủ tướng Phạm Minh Chính, Kơdră Khŭl chih hla ar kăl găh Mŭk drăm - Tơpôl Hop akŏm bơngai tang măt lơ̆m teh đak ‘măng mă XIV kơ Đảng (Khŭl chih hla ar kăl găh Mŭk drăm - Tơpôl) pơgơ̆r ‘măng hop akŏm Khŭl kơdră chĕp kơ̆l Teh đak hăm Kơdră chĕp kơ̆l Khŭl chih hla ar kăl găh Mŭk drăm - Tơpôl vă ăn tơgop nơ̆r hăm hla ar chih hơmet Tơroi tơbăt hơlen lăng 5 sơnăm bơ̆jang kiơ̆ Tơdrong jang hơtŏk tơiung mŭk drăm - tơpôl 5 sơnăm 2026 -2030. Pơtôch ‘măng hop akŏm, Thủ tướng Phạm Minh Chính chih iŏk, lăng ‘lơ̆ng dôm nơ̆r tơgop đĭ jơhngơ̆m, gơh hơgei, tơnăp đơ̆ng dôm bơngai jang lơ̆m Khŭl jang păng dôm bơngai tang măt vang truh hop akŏm; athei Grŭp chih hơmet tơpăt tơchĕng hơlen, chih iŏk dôm nơ̆r tơgop đơ̆ng dôm bơngai jang lơ̆m Khŭl jang, tơtĕnh chih pơkeh Hla ar chih ming Tơroi tơbăt.

Thủ tướng tơtă găh tơdrong tơm ưh kơ tơplih mă lei kăl chih tơmơ̆t dơ̆ng dôm hơnăp jang, trong jang ‘lơ̆ng vă pơm đei dôm tơdrong hơiă ‘nao, tưk tơiung ‘nao ăn jăl jang 2026 – 2030 vă jang đang tơdrong tơm truh sơnăm 2030 jĭ teh đak tŏk bŏk hơtŏk tơiung đei kơmăy kơmŏk ‘nao, iŏk yua jô̆ păh lăp lơ.