‘Nâu jing ‘măng mă 4 Thủ tướng năm hơlen, pơgơ̆r tơdrong jang ming man cham gre păr apŭng plenh teh Long Thành lơ̆m 2 sơnăm kơ âu, ăn ƀôh tơdrong tơrĕk kăp gĭt đơ̆ng Đảng, Jơnŭm pơgơ̆r teh đak hăm tơdrong ming man âu. Lơ̆m jơ pơm jang tơ̆ anih ming man, Thủ tướng Phạm Minh Chính ră hơdah, âu jing um pơtih kăp gĭt ăn kơ jăl jang Hop akŏm mă 13 kơ Đảng.

Kơyuơ noh, Thủ tướng pơgơ̆r dah tenh kuăng ming man keh đang pơtêng hăm pơkăp hơdrol kơ noh, hăm tơchơ̆t truh năr 31/12/2025 athei keh đang tơdrong ming man âu vă sơng kơ kuh kơ Hop akŏm Đảng jơ̆p teh đak ‘măng mă 14, tơbăt 80 sơnăm năr Kuôk khanh, 50 sơnăm tơblah đei jơnei tơring pơbah, rơngei teh đak. Thủ tướng pơgơ̆r Anih tơm jang găh Trong nơnăm Pơdŭ tơmam drăm dah tenh kuăng tơroi ăn jơnŭm pơgơ̆r tơ̆ kơpal băt gah tơdrong ming man trong mă 2 ăn gre păr tŏk jur, Phó Thủ tướng Lê Thành Long kơtă pơgơ̆r tơdrong tơroi chih akŏm tơdrong ming man âu tơbang ah ‘măng hop akŏm mă 8 Kuôk hô̆i jăl 15.