Kơmăng năr (10/09), Thủ tướng teh đak bơ̆n Phạm Minh Chính, Kơdră Jơnŭm pơgơ̆r jang kơ teh đak gah dôm tơdrong ming man kăp gĭt kơ teh đak, tơdrong jang dơnơm kơ anih jang gah trong nơnăm chơ pơdŭ tơmam drăm pơgơ̆r 'măng hop akŏm mă 20. 'Măng hop akŏm đei pơgơ̆r trư̆k tuyê̆n hăm 27 tơring. Truh dang ei jơ̆p teh đak hlôi đei 2.476 km trong kơdou hrenh. Anih tơm Ming man păng rim tơring tŏk bŏk oei hơdrin ming man 733km trong oei lăi lơ̆m 22 tơdrong ming man. Tơ̆ 'măng hop akŏm, tang măt ăn dôm tơring, anih iŏk ming man tơroi hơdah tơdrong pơkăp jơnŭm pơgơ̆r 2 tăl đei tơrĕk truh tơdrong hrŭ 'mong iŏk teh ming man, asong jên ăn tơdrong ming man; tơƀôh hơdah tơdrong drŭt tenh tơlĕch ming man... Atŭm hăm noh ăn tơbăt, minh ƀar tơdrong jang tơm đei pơm jang lơ̆m pơyan 'mi, pơrăm truh tơdrong tơlĕch ming man.

Pơma ah hop akŏm, Thủ tướng Phạm Minh Chính ră hơdah, tơchơ̆t hơtŏk kơjung mă lei athei kơjăp sơđơ̆ng, lơ̆m noh, jên asong ming man jing minh jơhngơ̆m pran vă hơtŏk tơ-iung. Rim anih jang tơm, rim tơring hăm pơkăp "tơtenh, pran kơtang" hloh dơ̆ng, drŭt tenh tơdrong tơlĕch ming man tơm. Thủ tướng pơgơ̆r jang tơnăp tơdrong asong sơnong pơgơ̆r "tơring tơlĕch tơchơ̆t, tơring pơm jang, tơring pŭ sơnong”. Thủ tướng adoi tơrĕk, rim anih iŏk ming man athei vei sơđơ̆ng tơdrong ming man, pơ-'nguaih cham char, vei sơđơ̆ng tơdrong pơm jang kiơ̆ trŏ tơchơ̆t.