Tĕh dơdrŏ dêh hlŏh tơ̆ Thổ Nhĩ Kỳ iŏk đơ̆ng sơnăm 1939, pơm ăn dôm jĭt rơbâu ‘nu bơngai lôch, kơhrĕng rơbâu ‘nu bơngai rơka, dôm jĭt rơbâu anih jang, hnam păk pơchăh păng Thổ Nhĩ Kỳ hlôi tơlĕch tơdrong krê hơmơt tơ̆ 10 dêh char, atŭm hăm ‘nŏh krao hơvơn tơdrong tơgŭm đơ̆ng tơpôl lơ̆m apŭng plenh tĕh.

Hăm jơhngâm đon ‘mêm băt, tơpăt ‘lơ̆ng, Việt Nam ăn 1 khul đei truh 100 ‘nu bơngai, lơ̆m nŏh đei 76 ‘nu linh tĕh đak păng 24 ‘nu linh Công an vang năm bơ̆ jang tơgŭm tơchă, dŏng, hơmet ăn bơngai răm, đĭ đăng linh hlôi yak hlŏh mơmat tat, pơlong nol jang ‘lơ̆ng hơnăp jang đei pơjao.

Pơma tơ̆ jơ pơm lêh, Thủ tướng tĕh đak ƀok Phạm Minh Chính chơt hơiă pôk pơ ư Anih tơm vei lăng khul linh, Anih tơm vei lăng Công an, kơchăng roi tơƀôh ăn Khul kơdră tĕh đak vă sek tơlang dôm tơdrong lơ̆m apŭng plenh tĕh; chĕp kơ̆l pơgơ̆r, jang hơdoi kơjăp hăm dôm anih tơm, anih jang kơpal, tơring tơrang păng dôm khul jang đei ƀơm truh pơgơ̆r ‘lơ̆ng ăn khul linh vang bơ̆ jang dŏng tơgŭm đơ̆ng rŏng kơ tĕh dơdrŏ tơ̆ Thổ Nhĩ Kỳ, jang đang ‘lơ̆ng tơdrong jang đei pơjao; tơgop pơm hơtŏk bưng ai, anih dơ̆ng đơ̆ng Việt Nam lơ̆m apŭng plenh tĕh.