‘Măng hop akŏm vă lăng hơlen, ăn tơgop nơ̆r găh tơdrong iŏk nơ̆r tơgop đơ̆ng kon pơlei păng pơm pơkeh Trong vă pơjing Khôi lkuơ̆t Groi teh (hơmet ming) pơtruh ăn Kuôk hô̆i păng tơdrong tơgoăt iŏk nơ̆r tơgop đơ̆ng Hơnih bơ̆ jang chĕp pơgơ̆r Kuô̆k hô̆i hăm trong vă pơjing Khôi luơ̆t Hnam oei (hơmet ming).

Iung pơma pơgơ̆r blŭng a, Thủ tướng teh đak Phạm Minh Chính tơbăt: Rim khei Khul kơdră teh đak đei 1 ‘măng hop akŏm găh tơ iung pơjing khôi luơ̆t, lơ̆m mă tơdrong yan au, Khul kơdră teh đak kăl druh kiơ̆ tơdrong yan au, yom kiơ̆ đei ƀôh yan au, iŏk tơdrong đơ̆ng yan au pơm ‘long pơtŏ vă tơ iung pơjing Khôi luơ̆t. Khei bnăr au ki, rim Hơnih tơm, hơnih bơ̆ jang hlôi iung jang dăr lăng hơlen rim hla bơar tơchơ̆t khôi luơ̆t, đei ƀôh rim tơdrong tơhlăk tơhlĭn, kiơ̆ đơ̆ng noh kơna vă hơmet ming, pơjing dơ̆ng, pơm pơkeh khôi luơ̆t vă pơchoh trong ‘lơ̆ng ăn atŏk tơ iung. Kuô̆k hô̆i hlôi iung jang đĭ ai, yak hơdoi hăm Khul kơdră Teh đak vă hơmet pơ ‘lơ̆ng dôm tơdrong tơnap tap, tơhlăk tơhlĭn lơ̆m jang kiơ̆ tơdrong jang chĭnh trĭ, mă kăl dôm tơdrong tơhlăk tơhlĭn đei ƀơm truh kon pơlei, hơnih mơdro sa, ‘moi kiơ̆ trong pơm sơđơ̆ng đei iŏk yua trŏ ƀlep kơ kon pơlei, hơnih mơdro sa.