Thủ tướng pơma hơdăh, Đảng păng Teh đak hơnơ̆ng năng pơtho pơhrăm jĭ trong jang tơm dơnơm kơ teh đak; Tơdrong tơlĕch tơdrong Tơchơ̆t 71 vă hơmet pơ ‘lơ̆ng dôm tơdrong oei tơhlăk, tưk tơiung anih pơtho pơhrăm. Đon pơhnŏng truh sơnăm 2035, đei anih pơtho pơhrăm gơh hơgei ‘lơ̆ng rŏ, pơm ‘lơ̆ng, hơtŏ băl; trong jang truh sơnăm 2045, Việt Nam mât lơ̆m grŭp 20 teh đak đei tơdrong pơtho pơhrăm dơ̆ng hơdrol lơ̆m apŭng plenh teh, đĭ đăng kon pơlei đei tơdrong ‘lơ̆ng vă hŏk pơhrăm truh đĭ chăl arih.

Tơdrong jang đei tơlĕch đơ̆ng sơnăm 2025 hăm dôm tơdrong jang tơm ‘nŏh: hơmet pơ ‘lơ̆ng khôi luơ̆t, chih pơjing trong tơgŭm gĭt kăl; hơlen năng, hơmet ming tơdrong pơtho hŏk phổ thông; tơmât yoa kơsơ̆p hla ar hŏk hrơ̆ch ‘lơ̆ng đơ̆ng sơnăm hŏk 2026-2027; năm truh tơdrong ƀơk đech hla ar hŏk ăn hŏk tro đơ̆ng sơnăm 2030. Atŭm hăm ‘nŏh, Khul kơdră teh đak jăh tơlĕch hrôih jên khei, jên tơgŭm plơ̆ng ăn khul thây kô păng kăn ƀô̆ vei lăng.