Thủ tướng teh đak bơ̆n Phạm Minh Chính athei Anih jang Pơtho Pơhrăm, rim anih jang tơm, anih jang Trung ương păng rim tơring akŏm jang kiơ̆ 9 sơnong jang tơm đei: Akŏm pơm kiơ̆ Tơchơ̆t kơsô̆ 91 đơ̆ng Anih tơm Chĭnh trĭ pơtoi pơm kiơ̆ Tơchơ̆t Tơplih ‘nao, hơtŏk jang tơnăp, đei jơnei tơdrong jang vei lăng kơ teh đak lơ̆m tơdrong jang Pơtho pơhrăm;  Hơtŏk hơgei ăn bơngai pơtho păng kan ƀô̆ pơgơ̆r jang gah pơtho pơhrăm, pơtrŏ hăm tơdrong pơkăl gah tơplih ‘nao kơ anih jang pơtho pơhrăm; Hơlen, sơkơ̆t tôm tơdrong tơplih gah tơchơ̆t pơtho hŏk pơhrăm, săch yăo khua ‘nao; Anih tơm Pơtho Pơhrăm păng rim tơring hơmet pơgơ̆r pơlong tôt ngĭp THPT sơnăm 2025 kiơ̆ Tơchơ̆t pơtho pơhrăm phôh thŏng ‘nao: "Truh sơnăm hŏk ‘nao 2024-2025, thơ thâu tôm kan ƀô̆ pơgơ̆r, bơngai pơtho hơnơ̆ng jang tơnăp sơnong jang păng dăp đon dăp bơnôh hăm tơdrong jang, găn hloh rim tơdrong tơnap tap, hơdrin jang kiơ̆ tơchơ̆t tơplih ‘nao tôm tong lơ̆m pơtho pơhrăm, pơtrŏ hăm tơdrong hơpơi ‘meh đơ̆ng Đảng, Teh đak păng kon pơlei, hơ-‘nhăk kon pơlei Việt Nam jing minh hơdrung bơngai gơh hơgei hloh nhen Ƀok Kơdră Hồ Chí Minh ‘mêm kơ-eng hlôi hơpơi đei. Thơ thâu hăm sơnăm hŏk ‘nao 2024 - 2025 đei jơnei ‘lơ̆ng tơnăp; rim bơngai pơtho grăng pran ling lang, tơgop lơ hloh dơ̆ng ăn tơdrong jang “pơtho pơhrăm kon bơngai”; hŏk tro, sinh viên hơnơ̆ng jĭ kon chu ngua, hŏk hơgei, jang đei jơnei dôm tơdrong hơpơi ‘meh, tơgop pơjing pơlei pơla, teh đak roi năr roi pơdrŏng pran kơtang".