Năr brei, năr 12/4, tơ̆ ‘măng hop akŏm mă 5 Hơnih bơ̆ jang chĕp pơgơ̆r teh đak găh rim tơdrong vă jang tơm teh đak, Thủ tướng Teh đak Phạm Minh Chính hlôi pơjao rim tơdrong jang hăm rim tơdrong vă jang hơdăh vă rim hơnih tơm, hpơnih bơ̆ jang, tơring hơlen jang kiơ̆ lơ̆m khei năr kơnh.

Mă kăl hăm tơdrong jang tŏk bŏk ming man, lơ̆m au 3 tơdrong vă jang trong gre rĕnh pơkăp hơdrol gô pơm keh đang păng gơ̆h ăn rok lơ̆m năr 30/4 sơnăm au (‘nŏh: Mai Sơn – Trong glung 45; Dầu Giây - Phan Thiết; Phan Thiết - Vĩnh Hảo), Thủ tướng athei, Hơnih tơm vei lăng Trong gre nơnăm kăl pơrô̆ kơtang athei rim hơnih jang atŏk kơtang ming man vă tơtom iŏk yua ƀlep lơ̆m khei ‘năr pơkăp, sơđơ̆ng pơm kơjăp ‘lơ̆ng, sơđơ̆ng ăn bơngai jang, sơđơ̆ng ‘lơ̆ng cham char. Hăm 14 dêh char, pơlei tơm pơm tơngla 3 trong gre rĕnh Hơlĕch-Pơmơ̆t păng 2 trong ver, Thủ tướng athei atok kơtang ming man keh đang hơdrol năr 30/6/2023. Thủ tướng jei athei Hơnih tơm vei lăng trong gre nơnăm iung jang hơdoi hăm rim hơnih tơm, hơnih bơ̆ jang, tơring tĕnh koăng hơmet pơ ‘lơ̆ng, pơm pơkeh hla bơar tơdrong vă jang; chih akŏm dôm tơdrong tơhlăk tơhlĭn đei ƀơm truh tơplih teh ƀa, teh bri, trong bơ̆ jang păng rim tơdrong tơgŭm djru vă tơroi tơbăt ăn Khul kơdră chĕp pơgơ̆r Kuô̆k hô̆i, Kuôk hô̆i lăng hơlen.