Năr 8/6, đơ̆ng rŏng kơ Lêh sơng tơ̆ Hơnih jang kơ Jơnŭm pơgơ̆r teh đak. Thủ tướng teh đak bơ̆n Lê Minh Hưng păng Thủ tướng Thái Lan Anutin Charnvirakul pơtơm pơma đam. Ƀar Thủ tướng chơt hơ-iă hăm tơdrong hơtŏk kơtang kơ tơdrong tơbôl Việt Nam – Thái Lan lơ̆m 50 sơnăm kơ ou jô̆ đơ̆ng iung jang tơbôl ah sơnăm 1976; bơnê kơ tơdrong tơbôl 2 pah dang ei tŏk bŏk oei hơtŏk 'lơ̆ng hloh đơ̆ng sơ̆ truh dang ei, hăm tơdrong lui ngeh dih băl gah chinh trĭ, jang hơdoi kơjăp gah mŭk drăm păng hơpeh hơpong kon pơlei roi tơguăt kơjăp.

Gah tơdrong jang mŭk drăm, 2 ƀok kơdră drơ̆ng nơ̆r pơm jang đei jơnei Tơchơ̆t “Pêng tơroh”; hơtŏk gah trong nơnăm, logistics, jang gah gre păr păng tơmang pơhiơ̆; hơlen hơtŏk tơdrong chơ pơdŭ tơmam drăm kiơ̆ trong teh, trong đak dơsĭ kơ 2 teh đak păng tơring Mê Công; iŏk yua tơnăp trong jang kơ Hơnih jang hơdoi Tĕch pơdro Việt Nam – Thái Lan; tang găn dôm tơdrong pơgăn gah tĕch pơdro, pơm trong hiôk ăn tơmam drăm gah tĕch hlot kơ 2 teh đak; hơdrin dah hrôih đei jơnei tơchơ̆t tĕch pơdro 25 tih đôlar păng pơkăp truh  50 tih đôlar kiơ̆ pơkăp hơtŏ hơnơ̆ng kơjăp sơđơ̆ng. Ƀar Thủ tướng sơkơ̆t hơdah, khŏm mă jang đei jơnei dôm tơchơ̆t hlôi pơdrơ̆ng, hơtŏk tơdrong tơbôl Jang hơdoi tôm tơdrong Việt Nam – Thái Lan hơtŏk roi năr kơjăp păng đei jơnei, tơgop kăp gĭt ăn tơdrong rơngei hiôk hian, jang hơdoi păng hơtŏk tơ-iung lơ̆m tơring.