Thủ tướng teh đak bơ̆n Phạm Minh Chính pơtruh nơ̆r apinh jet gia gah jơhngơ̆m jăn đơ̆ng ƀok Tổng Bí thư, Kơdră teh đak bơ̆n Tô Lâm truh hăm Ƀok Pơtao, hơkăn ƀok pơtao păng teh đak Thái Lan; thơ thâu hơ-iă hăm yă Paetongtarn Shinawatra đei ƀok pơtao pôk jang Thủ tướng Thái Lan; lui ngeh Jơnŭm pơgơ̆r teh đak Thái Lan păng kon pơlei Thái Lan gô pơtoi đei iŏk jơnei tih hloh lơ̆m tơdrong tơ-iung pơjing păng hơtŏk teh đak.

Thủ tướng Phạm Minh Chính sơkơ̆t hơdah, trong tơchơ̆t jang tơbôl drơ̆ng minh đơ̆ng Việt Nam, lăng tơgĭt păng hơpơi ‘meh hơtŏk tơbôl Việt Nam – Thái Lan hơtŏk roi năr roi pran kơtang. Ƀar Thủ tướng hmach bơnê kơ tơdrong tơbôl Jang hadoi Việt Nam – Thái Lan tŏk bŏk oei hơtŏk pran, jang đei jơnei lơ tơdrong; drơ̆ng nơ̆r dah hrôih hơtŏk tơbôl kơ 2 teh đak jang Hadoi tôm tơdrong tơlĕch.