Pơma dơnuh tơ̆ âu, Thủ tướng teh đak bơ̆n Phạm Minh Chính xơkơ̆t hơdăh, FPT jing anih jang mŭk drăm yuk hơlâu găh tơplih kơsô̆ tơ̆ Việt Nam đơ̆ng xơnăm 2016. FPT atŭm hăm dôm anih jang mŭk drăm kŏng ngê̆ nai kơ Việt Nam hlôi đei hơtŏk kơtang hloh, tơgop hơ-‘nhăk Việt Nam tơ-iung jing anih hơgei găh kŏng ngê̆ thŏng tin hăm minh ƀar tơdrong jang. Thủ tướng ră hơdăh, kiơ̆ đơ̆ng dôm tơdrong tơnap tap păng hơtŏk, jăl trong mă FPT yak kiơ̆ vă hơtŏk kŏng ngê̆ thŏng tin, pơjing phân mêm, pơm tơlĕch chip jing jăl trong hơyak trŏ ƀlep hloh, trŏ hăm FPT, trŏ hăm trong pơm jang kơ apŭng plenh teh, tơdrong erih jang xa kơ teh đak bơ̆n. Thủ tướng teh đak pơgơ̆r Anih tơm Pơtho Pơhrăm păng dôm anih jang tơm đei tơrĕk jang atŭm hăm FPT atŭm chă hơlen, tơlĕch trong jang vă pơtho bơngai jang rơgei hloh, vă tơgop tơ-iung pơjing teh đak Việt Nam pran kơtang păng jơnap.