Tơ̆ 'măng pơm jang, Thủ tướng teh đak bơ̆n Phạm Minh Chính hlôi tơmơ̆ng kơdră Anih tơm Choh jang xa păng Cham char; kơdră pơlei tơm Huế păng dôm dêh char: Quảng Trị, Hà Tĩnh, Nghệ An, Thanh Hóa… tơroi gah tơdrong jang tơjră hăm 'mi kial kơsô̆ 5. Hăm pơkăp “tang găn hơlou hloh kơ tơjră”, Thủ tướng pơgơ̆r athei hơmet kơjăp hloh. Thủ tướng kăp gĭt ră hơdah, tơdrong tơjră hăm 'mi kial kơsô̆ 5 'noh hơdrol hloh athei mă sơđơ̆ng tơdrong hơrih ăn kon pơlei.

Thủ tướng pơgơ̆r rim jăl pơgơ̆r tơring, rim anih jang kơchăng hơmet đơ̆ng 'năr ou, hăm tơdrong tơnăp hloh; atŭm hăm noh hơlen mă kơjăp, kơchăng tơlĕch dôm trong jang vă tơjră. Jơnŭm pơgơ̆r jang kơ teh đak gah akŏm kon pơlei hơmŏ pơjing Anih pơgơ̆r jang tơ̆ tơring tơ̆ Anih tơm pơgơ̆r khul linh Kuân khu 4 pơm anih tơm pơgơ̆r jang kơjăp hăm Anih tơm Choh jang xa păng Cham char atŭm hăm rim khul jang đei tơrĕk.