Tơ̆ jơ xơng Kơdră jang tang măt ăn teh đak Malaysia, Thủ tướng teh đak bơ̆n Phạm Minh Chính bơnê kơ ƀok Dato’ Tan Yang Thai iŏk xơnong jang tơ̆ Việt Nam păng hơpơi ‘meh lơ̆m jăl jang kơ po, Kơdră jang tang măt gô chĕp vei xơnong jang pơm gơng tơroh kăp gĭt vă hơtŏk tơbôl âu pơtoi hơtŏk tơ-iung roi năr roi kơjăp hloh. Tơ̆ jơ xơng Kơdră jang tang măt ăn teh đak Campuchia tơ̆ Việt Nam, Thủ tướng teh đak bơ̆n Phạm Minh Chính hlôi hmach bơnê kơ yă Chea Kimtha đei pôk jing Drăkăn jang kơdră tang măt mă blŭng ăn Campuchia tơ̆ Việt Nam; hmach bơnê kơ dôm tơdrong đei jơnei tih tên găh tơdrong jang lơ̆m teh đak păng hăm teh đak đe mă Campuchia hlôi đei iŏk lơ̆m khei năr âu ki. Thủ tướng lui ngeh Campuchia gô pơgơ̆r keh kong tơdrong pôk rơih Kuôk hô̆i jăl 7 păng Tơdrong pơlong Tơplŏng kơdâu Đông Nam Á ‘măng mă 32, xơkơ̆t Việt Nam kơchăng tơgŭm, tơroi tơdrong hlôh vao vă Campuchia pơgơ̆r đei jơnei tơdrong tơplŏng kơdâu kăp gĭt âu. Thủ tướng pơkăl 2 păh pơtoi adrin pơma đam xek tơlang 16% trong xơlam teh tam mă keh đang ƀŭ jrăng pơkăp tơkăng teh vă pơjing trong xơlam teh rơngei hiôk hian, jang tơbôl păng hơtŏk tơ-iung; atŭm hăm noh pơkăl găh Campuchia pơtoi tơrĕk, xek tơlang hla bar pơkăp khôi lươ̆t ăn bơngai hơdrung Việt tơ̆ Campuchia, pơm trong hiôk ăn kon pơlei Việt Nam tơ̆ Campuchia pơm jang, erih xa xơđơ̆ng tơ̆ teh đak Campuchia.