Tơdrong vă jang đei hơgăt teh să hloh 1.250 héc ta, mưh keh đang gô pơm tơplih ‘nao kơ pơlei tơm Cam Ranh. Tơdrong vă jang Hơnih oei kơdrơ̆m tơter ving Cam Ranh, dêh char Khánh Hoà să 1.254 héc ta, hlŏh 230.000 ‘nu bơngai găh lơ̆m 10 tơring, phương tơter ving Cam Ranh, pơlei tơm Cam Ranh. Tơdrong vă jang đei 8.500 pơbŭng hnam tơtil, hloh 10.000 tŏ hnam tih ‘lơ̆ng, vă jê̆ 20.000 hnam oei tơpôl. Akŏp kon jên tơmơ̆t jang hloh 85.000 ti hlak jên, tim mă jô̆ truh kon jên hrŭ ăn, kon jên tơgum pơjing tơring oei ‘nao.

Tơdrong jang ming man đơ̆ng sơnăm 2023 truh sơnăm 2027. Tơdrong tơm kơ tơdrong vă jang ‘nŏh tơ iung pơjing hơnih oei kơdrơ̆m ‘nao ‘lơ̆ng hơ iă, đei hơnih hnam oei, hơnih pơchơt pơhiơ̆, hnam trương hŏk, hnam pơgang, kơchơ, Hơnih mơdro sa tơm, hơnih pơdơ̆h pơdei, cham golf, cham să. Tơdrong vă jang mưh pơm keh đang gô tơgop iŏk yua teh au ‘lơ̆ng hơ iă, pơtrŭt atŏk tơ iung mŭk drăm-tơpôl tơring ving Cam Ranh atŏk tơ iung.