Iung pơma tơ̆ hop akŏm, Thủ tướng Phạm Minh Chính tơbăt, đŏng blŭng jăl jang truh dang ei, Khul kơdră Teh đak hlôi pơgŏr 42 ‘măng hop akom găh tơ iung pơjing khôi lươ̆t, lơ̆m ou, đơ̆ng blŭng sơnăm 2025 truh dang ei, hlôi pơgơ̆r 9 ‘măng hop akŏm; lăng hơlen, ăn tơgop nơ̆r dang 80 hô sơ vă pơjing khôi luơ̆t, tơdrong tơchơ̆t. Tơchĕng lăng tơ̆ ‘Măng hop akom mă 10, Kuô̆k hô̆i jăl XV, Khul kơdră teh đak gô pơtruh ăn Kuô̆k hô̆i dang 113 hô sơ, hla bơar chih tơbăt bơ̆ jang, lơ̆m ou đei 47 tơdrong vă pơjing khôi luơ̆t, tơdrong tơchơ̆t. Jơ ‘năr đơ̆ng dang ei truh pơgơ̆r pơtôch ‘Măng hop akŏm mă 10, pă đunh bơih, tơdrong bơ̆ jang hơmet ăn ‘noh jĭ tôch kơ lơ, Thủ tướng akhan, tơdrong jang, tơlĕch ăn tôch kơ lơ, tôch mơmat tat. Kơ yuơ lơ loh athei rim Kơdră chĕp pơgơ̆r kơpal, kơdră hơnih bơ̆ jang, kơrŭn đĭ ai, iung jang kơtang, jơnei vă jang keh đang trong tơlĕch jang tơ iung pơjing, pơm pơkeh tơdrong tơchơ̆t, ƀơ̆t măt kăl sơđơ̆ng ‘lơ̆ng găh tơdrong ‘lơ̆ng, tơtom kiơ̆ nơ̆r tơchơ̆t iung jang rim tơdrong vă pơjing khôi luơ̆t, tơdrong tơchơ̆t pơtruh ăn Kuô̆k hô̆i pơdrơ̆ng nơ̆r.