Lơ̆m tơdrong jang tơbôl, lui ngeh păng rơ hâu, 2 Thủ tướng drơ̆ng nơ̆r akhan, tơdrong tơ bôl joăt joe Việt - Trung yua đơ̆ng Kơdră Hồ Chí Minh, Kơdră Mao Trạch Đông păng dôm jơ hngơ̆r kơdră chĕp kơ̆l hơdrol kơ 2 teh đak tơ iung pơ jing jĭ tơmam drăm atŭm kăp gĭt đơ̆ng 2 Đảng, 2 teh đak, kăl kơ ưh kơ pơdơh iŏk jang pơ tăl, vei lăng păng hơ tŏk ‘lơ̆ng; pơma hơdăh tơdrong gĭt kăl đơ̆ng tơdrong pơvei 2 pang hăm tơdrong hơtŏk tơiung đơ̆ng 2 teh đak kŭm nhen tơdrong rơngei, sơđơ̆ng, jang hơdai, hơtŏk tơiung kơ tơring păng lơ̆m apŭng plĕnh teh.

Găh trong vă jang pơ trŭt jang hơdai tơ̆ hơnăp kơnh, 2 Thủ tướng drơ̆ng nơ̆r gô hơ tŏk loi dơ̆ng pơma dơnuh, jang hơdai, hơdrin pơ trŭt tơdrong pơvei 2 pang yak mơ̆t lơ̆m jăl jang hơtŏk tơiung ‘nao, mă loi ‘noh pơ trŭt dôm tơdrong jang hơdai, mă kăl ‘noh jĭ jang hơdai mŭk drăm, mơdro sa yak mơ̆t lơ̆m iŏk yua, jơ nei, kơ jăp; pơ vei trong jang hơdai tơbôl đơ̆ng Anih tơm vei lăng khŭl linh, Anih tơm vei lăng kŏng an 2 teh đak, vang pơ jing tơ ring sơ lam 2 teh đak jing trong sơlam rơngei, sơđơ̆ng, jang hơdai păng hơ tŏk tơ iung.