Gơmăng năr 06/4, tơ̆ Hơnih bơ̆ jang ăn Khul kơdră teh đak, Thủ tướng Teh đak Phạm Minh Chính hlôi sơng pơma dơnuh hăm Kơ iĕng Thủ tướng teh đak Nga Dmitry Chernyshenko tŏk bŏk năm tơmang tơ̆ Việt Nam păng vang chĕp pơgơ̆r ‘Măng hop akŏm mă 24 Hơnih bơ̆ jang hơdoi Khul kơdră Teh đak Việt Nam-Nga găh jang hơdoi mŭk drăm-mơdro sa păng khoa hŏk-kih thuơ̆t đơ̆ng năr 05 truh năr 07/4/2023.

Tơ̆ ‘măng sơng pơma dơnuh, Thủ tướng Teh đak Phạm Minh Chính sơkơ̆t hơdăh, Khul kơdră Teh đak Việt Nam hơnơ̆ng lăng kơjăp tơdrong tơgoăt tơgoăl joăt joe păng jang hơdoi ‘lơ̆ng hơ iă ‘moi kiơ̆ jơhngơ̆m đon Jang hơdoi gĭt kăl tôm tong Việt Nam-Nga. Ƀar păh hôn bơnê kơtang dôm tơdrong iŏk đei jơnei lơ̆m jang hơdoi dih băl lơ̆m khei năr au ki hăm tơdrong trong tơgoăt tơgoăl chĭnh trĭ đei vei kơjăp, jang hơdoi lơ̆m rim tơdrong joăt joe hơnơ̆ng đei pơtrŭt kơtang; sơkơ̆t hơdăh ‘Măng hop akŏm mă 24 Hơnih jang hơdoi Khul kơdră Teh đak Việt Nam-Nga ‘nŏh jơ rơvơn vă ƀar păh chă pơma dơnuh, drơ̆ng mĭnh nơ̆r rim trong atŏk kơtang hloh dơ̆ng jang hơdoi dih băl, adoi nhen pơjing đei hơyak pran ‘nao vă tơlĕch jang kiơ̆ jơnei tơdrong vă jang hơdoi lơ̆m khei năr au kơnh.