Pơgê năr 05/4, tơ̆ Viêng Chăn, Lào, Hop akŏm Kơdră kơpal ‘măng mă 4 Hơnih bơ̆ jang Khul đak kroong Mekong apŭng plĕnh teh hlôi đei pơgơ̆r hăm hơnăn “Tơplih ‘nao păng jang hơdoi vă sơđơ̆ng thoong đak păng tơdrong atŏk tơ iung kơjăp ‘lơ̆ng tơ̆ tơring Pơbăh đak kroong Mekong”.

Vang năm Hop akŏm đei Thủ tướng teh đak rim teh đak Việt Nam, Lào, Campuchia, Tổng Thư ký Hơnih bơ̆ jang vei lăng Mŭk drăm đak Thái lan atŭm hăm Kơdră chĕp pơgơ̆r păng tang măt ăn rim Khul jang hơdoi pơma dơnuh, Khul jang hơdoi atŏk tơ iung, rim hơnih bơ̆ jang apŭng plĕnh teh, tơring, rim khul jang tơpôl păng kon pơlei. Thủ tướng Teh đak Phạm Minh Chính hlôi đei ƀai iung pơma gĭt kăl tơ̆ hop akŏm.  Thủ tướng Teh đak pơma tơbăt jơhngơ̆m đon tơtăm kơ yuơ găh pơbăh thoong đak kroong tŏk bŏk dơ̆ng tơ̆ hơnăp tơdrong long tim lăh ƀôh kơ yuơ đei ƀơm kơnê̆ đơ̆ng tơplĭh tŏ ‘mi kial, tơdrong kơhret đơ̆ng ‘mĕh vă atŏk tơ iung păng tơdrong iok yua đak kơtang; pơma hơdăh, kăl tơplih ‘nao trong jang hơdoi păng đei hơyak jang trŏ lăp vă jang keh đang tơdrong ƀơ̆t măt đei tơlĕch dang ei, adoi tơlĕch minh ƀar trong jang kăl pơm kiơ̆ găh pơchoh trong jang hơdoi kơ Khul lơ̆m khei năr kơnh. Atŭm hăm ‘nŏh Thủ tướng athei, atŏk tơ iung mŭk drăm rơgoh ‘lơ̆ng, atŏk tơ iung ŭnh hơyuh hơ iă, tơgop atŏk tơ iung kơjăp ‘lơ̆ng.