Pơma tơ̆ hop akŏm, Thủ tướng pơma tơƀôh, hăm jơhngâm đon hơnơ̆ng yak hơdoi hăm anih tĕch mơdro, tơchă lơ trong jang hơiă, trong jang ‘nao, lăp hăm tơdrong tĕch mơdro lơ̆m tĕh đak, tơ̆ tơring păng lơ̆m apŭng plenh tĕh vă tơgŭm ăn anih tĕch mơdro yak hlŏh tơdrong pơmat tat, pơlong nol, tưk tơiung tơdrong jang xa, pơm tơlĕch, tĕch mơdro tơ̆r ‘long tŏk pran kơjăp, pơm ‘lơ̆ng ăn tơdrong răt yoa lơ̆m tĕh đak păng hơtŏk kơjă mưh tĕch tơ̆ tĕh đak đe: hăm tơ̆r ‘long sơnăm 2023 ‘nŏh đei 17,5 ti USD păng ka hơdang ‘nŏh đei 10 ti USD.

Thủ tướng athei hop akŏm pơma nuh mă hơlen, pơm hơdăh tôm tơdrong, mă trŏ, lăng ƀôh dôm tơdrong pơmat tat, tơhlăk tăk ƀơm ưh ‘lơ̆ng truh tơdrong jang xa, pơm tơlĕch păng tĕch mơdro tơmam đơ̆ng tơ̆r ‘long păng ka hơdang, mă loi jĭ ƀơm truh tơdrong pơm hơtok jên đơ̆ng tĕch mơdro tơ̆ tĕh đak đe. Hop akŏm oei roi tơƀôh lơ tơdrong kăl păng ƀai hŏk kăp gĭt đơ̆ng dôm anih jang, tĕch mơdro, trong jang hơiă kăl đei pơih xă tơ̆ hơnăp kơnh.