Lơ̆m kơsơ̆ năr 3/4, Hop akŏm trư̆k tuyên Khul kơdră Teh đak hăm tơring pơma dơnuh găh Hla bơar bơ̆ jang tơbăt lăng hơlen tơmơ̆t dơ̆ng pơtôch jang kiơ̆ trong vă jang teh đak tơmơ̆t jên jang sơnăm 2022, tơdrong atŏk tơ iung trong pơ prŏ jang teh đak tơmơ̆t jên jang sơnăm 2023; Hla bơar tơbăt hơlen tơmơ̆t dơ̆ng pơtôch jang kiơ̆ trong pơ prŏ jang atŏk tơ iung mŭk drăm sơnăm 2022, tơdrong atŏk tơ iung trong pơprŏ jang atŏk tơ iung mŭk drăm-tơpôl sơnăm 2023; Hla bơar tơbăt hơlen lăng tơmơ̆t dơ̆ng pơtôch jang kiơ̆ kon jên bơ̆ jang teh đak sơnăm 2022, tơdrong tơlĕch jang kiơ̆ kon jên jang teh đak sơnăm 2023.

Tơ̆ hop akŏm, rim kơdră tang măt hlôi drơ̆ng nơ̆r hăm Hla bơar tơbăt vă pơtruh ăn Kuôk hô̆i lăng hơlen. Mălei, kăl tơmơ̆t dơ̆ng, pơm hơdăh mĭnh ƀar tơdrong, mă kăl ‘nŏh hơlen hơdăh khei ‘năr apŭng plĕnh teh đei ƀơm ư̆h kơ ‘lơ̆ng trŭh tơ̆ Việt Nam, dôm tơdrong tơnap tap, tim mă ‘lơ̆ng găh tơdrong jang mŭk drăm; dôm tơdrong tơhlăk tơhlĭn kăl hơmet pơ ‘lơ̆ng vă atŏk kơtang teh đak tơmơ̆t jên jang, jang kiơ̆ kon jên jang Teh đak păng atŏk tơ iung mŭk drăm-tơpôl. Pơma pơtôch hop akom tơ̆ kơsơ̆, Thủ tướng Teh đak Phạm Minh Chính tơƀôh hơdăh, tim mă tơplih trong jang atŏk sơnăm 2023 păng trong tơlĕch jang tang găn tơdrong tŏk jur. Mă lei, rim hơnih tơm, hơnih jang kăl kơrŭn đi jơhngơ̆m vă jang keh đang, adoi đei lăng hơlen, băt hơdăh tơdrong, đei trong tơlĕch jang tang găn tơtom.