Kiơ̆ kơ noh, 231 kang ƀô̆ hlôi đei Anih jang Tĭnh uy pôk jang dôm kơchư̆k jang dơnơm nhen: Ƀĭ thư, Phŏ Ƀĭ thư păng Kơdră Anih jang vei lăng kon pơlei xah jăl jang 2025–2030, tơguăt hăm jăl pơgơ̆r tơring đơ̆ng 2021–2026. Tơrĕk hloh noh, đei 2 bơngai jang tơ̆ dêh char đei pôk jang ƀĭ thư xah, phương. Noh ƀok Nguyễn Xuân Phước, jang lơ̆m Tĭnh uy, sơ̆ jang Ƀĭ thư Thĭ uy An Khê đei pôk jang Ƀĭ thư Đảng uy phương Pleiku; ƀok Lưu Trung Nghĩa, jang lơ̆m Tĭnh uy, Kơdră Hơnih Choh jang xa păng Cham char đei pôk jang Ƀĭ thư Đảng uy phương An Phú. 

229 kang ƀô̆ nai noh kơdră dôm apŭng, thĭ xah, pơlei tơm (gô tơklah) păng minh ƀar hơnih jang tơ̆ dêh char. Tơ̆ hop akŏm, Tĭnh uy Gia Lai sơkơ̆t hơdah: xah 'nao jing hơnih kơtă pơm kiơ̆ tơchơ̆t tơlĕch đơ̆ng Đảng păng Teh đak, sek tơlang jê̆ 80% tơdrong jang hanh chinh kơ tơring. Kơyuơ noh, sơnong jang tơnăp đơ̆ng khul kang ƀô̆ dơnơm jing tơdrong sơnong jang kăp gĭt.