Kơmăng hei 11/9, tơ̆ Tokyo, Anih tang măt ăn Việt Nam tơ̆ Nhật Bản pơm lêh tih tơbăt 80 sơnăm Quốc khánh teh đak Cộng hòa xã hội chủ nghĩa Việt Nam, hăm tơdrong vang akŏm đơ̆ng dang 500 ‘nu kuan tih dơ̆ng tang ăn Khul kơdră teh đak, dôm anih jang, anih tĕch mơdro, tơring, khul chih tơdrong kơtơ̆ng ang kơ Nhật Bản păng dôm anih jang tơbôl kơ teh đak đe tơ̆ Nhật Bản. 

Pơma tơ̆ jơ pơm lêh, Bơngai tang măt tôm tơdrong ăn Việt Nam tơ̆ Nhật Bản Phạm Quang Hiệu roi tơbăt khei ‘năr chăl sơnăm ‘lơ̆ng hơiă ƀât 80 sơnăm adrol sơ̆, hăm tơdrong hơiă hlŏh jĭ ‘năr 2/9/1945 păng jăl trong ƀĕnh tơdrong pơmat tat, mă lei tôch hưch hanh, hăm dôm tơdrong jơnei tih đơ̆ng hơdrĕch hơdrung Việt Nam.

Bơngai tang măt găh Nhật Bản, ƀok Fukuyama Tetsuro – Phŏ Kơdră Thượng viện Nhật Bản hơiă kơ Việt Nam ƀlep ƀât 80 sơnăm Quốc khánh, tơƀôh đon lui kŭp yom hăm dôm tơdrong jơnei Việt Nam iŏk đei lơ̆m khei ‘năr âu ki, atum hăm ‘nŏh pơma hơdăh tơdrong hơpơi ‘mĕh pơm pơ ‘lơ̆ng hlŏh tơdrong pơvei hăm Việt Nam tơ̆ hơnăp kơnh.