Pơma tơ̆ jơ tơƀơ̆p muh măt, Kơdră Anih jang Trung ương Mặt trận Tổ quốc Việt Nam Đỗ Văn Chiến pơtruh nơ̆r ƀlŏk hơdơ̆r gĭt kăl hăm bôl buăl apŭng plĕnh teh hlôi tơgŭm, tơgop ăn tơdrong jang iung tơblăh iŏk tơngei hơdrĕch hơdrŭng, jơnei teh đak, pơjing păng vei lăng Teh đak Việt Nam. Việt Nam tŏk bŏk hơdrin truh sơnăm 2030 jing teh đak hơtŏk tơiung, đei kơmăy kơmŏk ‘nao, iŏk yua jô̆ păh lăp lơ, truh sơnăm 2045 jĭ teh đak hơtŏk tơiung, đei iŏk yua lơ.

Vă  jang đei dôm tơdrong hơgăt ‘noh, ƀok Đỗ Văn Chiến pơma hơdăh, Đảng, Teh đak păng Kon pơlei Việt Nam ‘meh vă gô hơnơ̆ng iŏk đei lơ hloh dơ̆ng tơdrong bơngơ̆t truh, tơgŭm ‘lơ̆ng, đei yua đơ̆ng bôl buăl apŭng plĕnh teh lơ̆m đĭ đăng rim tơdrong jang. Ƀlep ƀơ̆t ‘măng âu, ƀok Đỗ Văn Chiến hlôi pơjao Mê đai Tơbôl păng Ƀăng khen đơ̆ng Thủ tướng teh đak ăn kơ dôm khŭl jang păng bơngai jang vă chih iŏk tơdrong tơgŭm păng tơgop ‘lơ̆ng đơ̆ng bôl buăl apŭng plĕnh teh hăm Việt Nam.