Kơsơ̆ (22/9), Anih tơm pơgơ̆r Khŭl lĭnh dêh char Đắk Lắk pơgơ̆r tơdrong jang tơƀơ̆p, pơma đam đơ̆ng rim jơhnơr kang ƀô̆, khŭl lĭnh ƀlep ƀơ̆t tơbăt 80 sơnăm Năr joăt joe khŭl lĭnh ƀô̆ đô̆i dêh char (23/9/1945 – 23/9/2025). Đunh kơ âu ƀlep 80 sơnăm, ‘năr 23/9/1945, Anih chĕp kơ̆l Đảng kơ khŭl Việt Minh tơ̆ Đắk Lắk hlôi tơchơ̆t pơjing Anih chĕp kơ̆l pơgơ̆r khŭl lĭnh dêh char, khŭl lĭnh tơm dơnơm ‘noh jĭ Tiểu đoàn Giải phóng quân N’Trang Lơng păng pơjing tơdrong jang khŭl lĭnh đơ̆ng dêh char jur tơ̆ tơring. Yak hloh 80 sơnăm iung tơblăh păng jang đei, rim jơhnơr kang ƀô̆, khŭl lĭnh hlôi ưh kơ đei pơdơh plang pơyơ̆r, hŭt hơkâu, tơgop vei lăng teh đak, jing hơnih gơnang kơjăp kơ Đảng, teh đak păng kon pơlei.

Hăm hơnăn “Yak kơjăp tơ̆ hơla hla kơ khŭl lĭnh khŏm jơnei”, jơ pơma dơnuh hơnhăk truh dôm tơdrong tơroi, jơhngơ̆m đon ƀlŏk đơ̆ng rim jơhnơr kơdră chĕp kơ̆l lơ̆m dôm khei sơnăm gleh hrat pơmat tat, kŭm hăm dôm nơ̆r tơroi găh trong jang pơjing khŭl lĭnh lơ̆m jăl jang ‘nao. Jơhnơr mơlôh hrei ‘nâu kŭm tơƀôh jơhngơ̆m đon khŏm jang pơtăl, hơtŏk tơdrong joăt joe đơ̆ng yă ƀŏk sơ̆, vei kơjăp đon lui păng đon tơchĕng kach mang. ‘Măng âu, Anih tơm pơgơ̆r khŭl lĭnh dêh char jang hơdai hăm Anih jang đoàn dêh char Đắk Lắk pơtôch tơdrong pơlong trực tuyến chă hơlen 80 sơnăm Năr joăt joe khŭl lĭnh ƀô̆ đô̆i dêh char, pơjao 28 tơmam hơpăh ăn tơpôl, kơdih iŏk jang jơnei hơgei hloh.