Dang ei lơ jăl trong gre 28B năm klĕch dôm xăh Phan Sơn, Tà Hine păng Ninh Gia (dêh char Lâm Đồng) hlôi jang đang tơdrong chưk pơih xă jih trong, 1,2 jăl đĭ pơtơm tuh yâu hăk bơih. Kiơ̆ kỹ sư Nguyễn Văn Thuận, dăr lăng tơdrong jang ming man tơdrong jang kơsô̆ 2, vă jang keh trŏ năr, anih jang akŏm tôch đa kơmăy kơmŏk păng bơngai jang, pơgĕnh bơ̆ jang lơ̆m rim năr ‘năr prăng ‘lơ̆ng: “Anih jang dang ei oei hơtŏk hrĕnh 4 grŭp jang chưk hơmet trong păng 2 grŭp jang tuh yâu hăk. Athei tơgĕch, pơgĕnh jang ƀât ‘năr tŏ ‘lơ̆ng vă jăh jang đang”.

Tơdrong jang pơm hơmet ming trong gre 28B kơjung hlŏh 68 km, hăm kơsô̆ jên jang loi 1.400 ti, yoa Anih vei lăng trong gre teh Việt Nam pơm tơ ‘ngla tơmât jên jang. ‘Nâu jĭ tơdrong jang gĭt kăl vă tơƀưh 2 tơring jang mŭk drăm Đà Lạt – Phan Thiết (bri kông hăm đak dơsĭ), hơtŏk tơdrong tơguăt tơring păng tơjur ƀiơ̆ tơdrong hơtăih băl đơ̆ng Tơring Hơlĕch păng tơring găh Pơmât. Tơlĕch jang đơ̆ng khei 4/2024, truh dang ei tơdrong jang âu hlôi jang đei hlŏh 40% tơdrong vă jang: hloh 30km trong đei tuh yâu hăk, 40km jih trong păng văjê̆ 58km trong hlôi đei tuh tơmo iĕ.

Tơ̆ trong krang Đại Ninh – tơring gĭt kăl hlŏh, 6 tŏ gơng tơ̆ kông oei hăt jang pơkĕh. Ƀok Trần Trung Hiếu, Bơngai vei lăng tơdrong jang pơm gơng tơ̆ kông kơsô̆ 3 (Công ty jang hơdoi 134 Việt Nam) ăn tơbăt, teh ưh kơjăp ‘lơ̆ng pơm ăn tơdrong kuer tih hơtâp jrăng hiong lơ jơnăr, mă lei anih jang oei hơdrin bơ̆ jang prăt măng prăt năr vă jang trŏ hăm tơdrong hơgăt: “Tơ̆ hơla teh ưh kơjăp ‘lơ̆ng, tôch pơmat tat kơna mưh khoan teh vă pơm jrăng ‘nŏh jing hiong lơ jơnăr. Truh 1 puăt khei ‘mơ̆i ‘nao jang đang jrăng hơtâp. Pơm tơ̆ kơpal ‘nŏh kŭm bơ̆ jang tŏk ka, hơtŏk khul bơngai jang vă bơ̆ jang roi hrĕnh ƀiơ̆ păng jang đang trŏ năr đei pơjao. Nhôn jang hloi tơ̆ kơ ‘năr păng tơ̆ kơmăng, akŏm dơ̆ng lơ khul jang, bơngai jang vă gơ̆h jang đang trŏ năr hơgăt păng pơjao gơng lơ̆m ‘năr 15/12 truh”.

Kiơ̆ trong vă jang, tơdrong jang gô đei jang đang lơ̆m khei 12/2025. Mă lei, ‘mi hơnơ̆ng păng tơhlăk lơ̆m tơdrong chưk pơ ‘ngoăih teh tơ̆ 1,2 jăl trong jing đei tơdrong pơmat tat tih, rŏ năng gô ƀơm ưh ‘lơ̆ng truh tơdrong bơ̆ jang ming man atŭm.