Tơ̆ dôm trong gre tơm nhen trong gre kơdâu hrĕnh Vĩnh Hảo – Phan Thiết; trong gre 27, 28B, trong krang Prenn… đei ƀôh lơ anih hơmơt teh tơmo hơlih găn trong, pơm ưh sơđơ̆ng ăn tơdrong yak vih vât kơ kon pơlei, gre tơ̆ trong. Kŭm hăm ‘nŏh jĭ tơdrong teh hơlih, chĭt găn trong hlôi đei tơ̆ lơ jăl trong lơ̆m dêh char lơ̆m noh đei Trong Đạo Nghĩa - Quảng Khê; trong DT715 năm klĕch xăh Hàm Thuận… Khul kơdră tơring păng anih jang kơpal kơ dêh char Lâm Đồng hlôi akŏm khul bơngai, kơmăy kơmŏk vă hơmet pơ ‘lơ̆ng dôm anih đei teh hơlih, pơih trong ăn gre kơdâu… hơtâp kơƀang roi tơbăt tơdrong krê ăn kon pơlei mưh yak vih vât.

Tơ̆ hơnăp tŏ ‘mi kial oei kơnê̆, Anih vei lăng kon pơlei dêh char Lâm Đồng đei hla ar chih, athei Anih Tang găn sar bar kơ dêh char, Anih vei lăng kon pơlei dôm xăh, phường păng tơring gĭt kăl Phú Quý kơchăng tơjră  hăm ‘mi tih, đak lơ̆p, đak tơjroh, teh hơlih. Dêh char Lâm Đồng dang ei đei 8 trong gre teh đak, akŏm đĭ đăng kơjung vă jê̆ 1.400km păng vă jê̆ 1.300km trong gre dêh char. Yoa lơ trong gre tam mă đei tơlĕch jên pơm hơmet ‘lơ̆ng, năm klĕch tơring bri kông kơna ƀônh đei teh hơlih, chĭt găn trong, ưh đei pơm sơđơ̆ng ‘lơ̆ng mưh yak vih vât lơ̆m pơyan ‘mi kial.