Hlôi jing juăt, ăh năr 10 khei 3 âm lĭch rim xơnăm, yă Tạ Thị Ka, tơ̆ phương Thống Nhất, pơlei tơm Buôn Ma Thuột năm truh Anih gru grua kơ hnưr erih kơ teh đak Đinh Lạc Giao, pơlei tơm Buôn Ma Thuột vă năm akŏm Xoi Yôk kơ Ƀok Tơnơm Hùng Vương. Yă Tạ Thị Ka ăn tơbăt, yă 'noh pơlei pơla tơ̆ Hưng Yên, truh erih jang xa tơ̆ Đăk Lăk jê̆ 50 xơnăm kơ âu. Dôm xơnăm adrol ki oei mơlôh grăng pran, xơnăm mă yơ yă adoi chôt vih xoi ƀlŏk tơ̆ tơring teh tơnơm Phú Thọ vang năm akŏm xoi ƀlŏk kơ ƀok Tơnơm. Mă lei pơhlom 10 xơnăm kơ âu, yă vang akŏm lơ̆m jơnŭm bơngai 'lŏ kră tơ̆ Đình Lạc Giao. Kơyuơ noh, roi tơjê̆ 'năr xoi ƀlŏk tơm, tơdrong hơmet hlôt nhang unh jrĕng, kơmang tơmam xoi ƀlŏk roi hăt hot hloh: Inh ƀôh tơdrong hơmet noh tơnăp grasia păng lăng atŭm tôm kon pơlei adoi ling weh kơ 'năr Yôk Ƀok Tơnơm, grasia, xô̆ hơ-iă păng rŏ krưp. Tơdrong mă tôm kon pơlei tơ̆ âu xô̆ hơ-iă hăt hot 'meh chôt vih tơ̆ tơring xoi ƀlŏk kơ đe ƀok Pơtao Hùng vă kơdih po plang hlôt nhang ling weh kơ tơm a hla chă po.

Tơ̆ Anih gru grua xoi ƀlŏk kơ teh đak Đinh Lạc Giao, rim xơnăm 'năr Yôk Ƀok Tơnơm Hùng Vương đei pơgơ̆r kăp gĭt hăm tơdrong vang akŏm đơ̆ng đe kơdră kơpal kơ dêh char, rim anih jang păng tôm kon pơlei. Rim kon pơlei adoi kŭp yom plang hlôt nhang ƀlŏk tơbăt, pơgơ̆r lêh xoi tang kơ Ƀok Tơnơm Hùng Vương. Vang năm akŏm xoi ƀlŏk, pơmai Nguyễn Ngọc Hà, tơ̆ phương Thống Nhất, pơlei tơm Buôn Ma Thuột tơroi: Lêh yôk ƀok tơnơm năr 10/3 hăm inh 'noh minh đoan viên, hơdruh tơdăm lơ̆m tơring teh kơ pơlei tơm Buôn Ma Thuột 'noh inh tôch hơ-iă, pheo ai đei năm akŏm lêh. Kiơ̆ đơ̆ng noh, inh đei rơvơn chă hŏk hơlen tơdrong juăt jue kơ hơdrung hơdrĕch Việt Nam, atŭm hăm noh adoi jing minh trong hiôk vă đe mơlôh vang akŏm dôm tơdrong joh ayŏ tơpôl vă pơm hơtŏk pơ-'lơ̆ng joh ayŏ kon pơlei Việt Nam.

Ưh adrô̆ tơ̆ Đăk Lăk mă tơ̆ dôm dêh char Tây Nguyên, Lêh Yôk Ƀok Tơnơm Hùng Vương đei pơgơ̆r grasia, kăp gĭt. Tơ̆ Lâm Đồng, đơ̆ng xơnăm 2002, Anih xoi ƀlŏk Âu Lạc hlôi đei pơjing tơ̆ kông Phượng Hoàng, lơ̆m anih tơmang pơhiơ̆ tơkơi Prenn, phương 3, pơlei tơm Đà Lạt, dêh char Lâm Đồng. Kiơ̆ kơ pơmai Phan Thị Thúy Vi, bơngai chơng tơroi tơmang pơhiơ̆ tơ̆ pơlei tơm Đà Lạt tơroi, anih xoi ƀlŏk âu đei pơjing kiơ̆ um rŭp kơ anih xoi ƀlŏk Đên Hùng tơ̆ Phú Thọ hăm um “rôih tang dơ̆t, kla gô, prao vei”, jing anih hơvơn lơ kon pơlei păng tơmoi truh akŏm lơ̆m 'năr Yôk kơ Ƀok Tơnơm rim xơnăm: Đên Thươ̆ng jing Anih xoi ƀlŏk kơ Lạc Long Quân păng mĕ Âu Cơ, oei ăh anih kơjung hloh pơtêng hăm anih tơmăn đak dơxĭ noh 1.250 met, năm jơ̆ng đơ̆ng hơla kơthôt tŏk truh tơ̆ âu noh pơhlom 630 tăl yak truh ăh groi kông Phượng Hoàng. Đơ̆ng rŏng Đên Thươ̆ng 'noh jur truh Đên Trung, anih xoi ƀlŏk kơ ƀok pơtao mă 7 păng jur truh Đên Hạ noh xoi ƀlŏk kơ ƀok pơtao mă hơtuch đĭ đăng kơ dôm chăl ƀok pơtao Hùng. Tơ̆ âu, hăm cham akŏm tôch xă 'noh hơnơ̆ng pơgơ̆r dôm tơdrong akŏm nhen akŏm trăi, akŏm pơlong 'nŭng ƀanh chưng rim xơnăm. Oei tơ̆ Đên Thươ̆ng 'noh ăh năr 10/3 đei lêh plang hlôt nhang, xoi ƀlŏk kơ đe ƀok pơtao Hùng.

Blŭng xơnăm âu, Anih jang vei lăng kon pơlei dêh char Đăk Lăk hlôi đei hla bar pơtruh hăm Thủ tướng teh đak bơ̆n găh tơdrong pơkăl ming man anih xoi ƀlŏk kơ Ƀok Pơtao Hùng tơring Tây Nguyên lơ̆m tơring teh. Kiơ̆ kơ noh, dêh char gô hơvơn jên vang jang lơ̆m tơpôl vă ming man anih xoi ƀlŏk kơ Ƀok Pơtao Hùng kơ tơring teh xă pơhlom 20ha, đei man ăh groi teh Cư Mblim, lơ̆m xăh Ea Kao (pơlei tơm Buôn Ma Thuột) păng xăh Ea Tiêu (apŭng Cư Kuin). Tơdrong axong ming man anih xoi ƀlŏk kơ Ƀok Pơtao Hùng vă tơbang đon bơnôh pôk bơnê kăp gĭt hăm đe Ƀok Yă Tơnơm hlôi akŏm jơhngơ̆m pơjing păng vei lăng teh đak, pơtho tơdrong juăt jue đon 'lơ̆ng hơƀăp "nhă đak ƀlŏk kơ tu". Atŭm hăm noh, 'măn ăn tơdrong akŏm đon lui khôi juăt kơ hơdrung hơdrĕch, jing tơdrong hơpơi 'meh đơ̆ng lơ kon pơlei dêh char Đăk Lăk adoi nhen dôm dêh char Tây nguyên. Ƀok Lại Đức Đại, Phŏ Kơdră Anih Joh ayŏ - Tơplŏng kơdâu păng Tơmang pơhiơ̆ Đăk Lăk ăn tơbăt, Anih jang Kơpal kơ teh đak hlôi tơl nơ̆r chih hơmet minh ƀar tơdrong đei tơrĕk vă keh đang hla bar pơkăp ming man: Anih jang vei lăng kon pơlei dêh char adoi pơjao ăn Anih jang Joh ayŏ - Tơplŏng kơdâu păng Tơmang pơhiơ̆ tang măt pơtruh nơ̆r hăm rim anih jang vă tơlĕch jang dôm tơdrong kăl vă ming man anih xoi ƀlŏk kơ Ƀok Pơtao Hùng tơring Tây Nguyên tơ̆ Đăk Lăk. Truh dang ei noh dôm tơdrong jang hơmet tŏk bŏk oei lơ̆m tơdrong jang mă hơtuch đĭ đăng kiơ̆ pơkăp đơ̆ng Anih jang đe Kơpal kơ teh đak. Tơ̆ dêh char 'noh hlôi hop akŏm, rim anih jang apinh axong jang păng adoi pơtoi đei pơdrơ̆ng nơ̆r vă pơtruh nơ̆r đơ̆ng Thủ tướng kĭ tơchơ̆t.

Đơ̆ng xơnăm 2012, Anih jang Unesco hlôi tơchơ̆t Tơdrong lui xoi ƀlŏk kơ Ƀok Pơtao Hùng tơ̆ Phú Thọ, Việt Nam jing mŭk drăm đon bơnôh kăp gĭt tang măt ăn kon bơngai. Tơdrong mă âu roi xơkơ̆t hơdăh găh đon bơnôh kon bơngai hăm khôi xoi ƀlŏk kơ Ƀok Yă Tơnơm đơ̆ng kon pơlei Việt. Tơdrong lui xoi ƀlŏk kơ Ƀok Pơtao Hùng jing um ai joh ayŏ, đon 'lơ̆ng hơƀăp juăt jue kơ kon pơlei Việt Nam. Adoi nhen kon pơlei lơ̆m jâ̆p teh đak, lơ̆m dôm năr âu, kon pơlei tơ̆ tơring Tây Nguyên atŭm ling weh kơ tơdrong xoi ƀlŏk kơ Ƀok Tơnơm kơ teh đak hăm đon bơnôh kŭp yom, hmach bơnê.