Pơgê năr 23/9 tơ̆ Hà Nội pơgơ̆r 'măng tơm kơ Hop akŏm bơngai tang măt ăn Đảng ƀô̆ Măt trâ̆n Tôh kuôk, rim jơnŭm jang Trung ương 'măng mă 1 jăl jang 2025-2030, hăm tơdrong vang akŏm đơ̆ng 346 'nu tang măt ăn hloh 5.000 đảng viên kơ Đảng ƀô̆. Hla bar tơbang ah Hop akŏm ră hơdah: Jăl jang ou ki, tôm Đảng ƀô̆ hlôi akŏm đei tơdrong tơguăt tơguăl, kơchăng tơplih 'nao, akŏm pơgơ̆r tôm tơdrong jang chinh trĭ păng tơdrong pơ-'lơ̆ng Đảng, đei jơnei lơ tơdrong kăp gĭt. Hơdah nhen: Hơtŏk kơtang tơdrong pơyua ăn tơpôl păng sut lê̆ hyah hyok kiơ̆ tơdrong hơvơn ming hơmet hloh 180.000 tŏ hnam Tơguăt tơguăl vă asong ăn unh hnam hin dơnuh. Atŭm hăm noh, lơ tơdrong hơlen đei jơnei pơtoi đei pơih să nhen: “Kon pơlei hơlen kang ƀô̆, đảng viên”, “Măt trâ̆n hơlen asong jang lơ̆m tơpôl”, “Hơlen tơdrong pơm kiơ̆ Tơchơ̆t hiôk hian tơ̆ tơring”…

Năm hop akŏm păng pơma pơgơ̆r Hop akŏm, Tổng Bí thư Tô Lâm ră hơdah 3 tơdrong pơgơ̆r hăm tôm Đảng ƀô̆ tơ̆ Hop akŏm bơngai tang măt ăn Đảng ƀô̆ Măt trâ̆n Tôh kuôk: noh jing iŏk Kon pơlei pơm tơm, dơnơm, tơchơ̆t păng akŏm jơhngơ̆m tơplih 'nao.  Rim tơchơ̆t, tơdrong pơm jang athei đei tơdrong tơl hơdah: pơyua kăp gĭt kiơ ăn kon pơlei, ăn tơpôl hơdah. Pơih să tơdrong hiôk hian tơ̆ tơring, hơtŏk tơdrong pơma dơnuh lơ̆m tơpôl, yak hơdoi hăm tơchơ̆t vă pơm jang, tơgĭt kiơ̆ khôi luơ̆t, tơgĭt yom gah tơdrong phara băl păng tơplih đơ̆ng tơdrong jang pơgia vă jang đei jơnei hơdah; tơrĕk hăm dôm tơdrong jang pơih să tenh, jên huach trŏ ƀlep, tơrĕk truh tơdrong hơrih, pơyua kăp gĭt ăn kon pơlei. Tổng Bí thư pơgơ̆r, dah pơtoi tơrĕk ăn tơdrong hơrih Kon pơlei hăm 6 tơdrong tơm hơrih xa ăn kon pơlei păng pơjao sơnong jang vei lăng dơnơm ăn rim jơnŭm jang măt trâ̆n.