Tơring groi kông Khánh Sơn, Khánh Vĩnh ư hơnhang hăm dôm pơgar sầu riêng, măng cụt, mít Thái, ƀơ, prit. Mă loi ‘noh, sầu riêng Khánh Sơn hlôi pơm tơiung hơnăn ‘lơ̆ng anih tĕch mơdro, jing tơmam hơnhăk ăn iŏk yua lơ ăn kon pơlei jang chŭn mir. Dôm pơgar ‘long sa plei jing ‘lơ̆ng, pơyan hơyơ tơmam ‘nei, ưh khan lăp jing hơnih pơtruh tơmam đơ̆ng choh jang sa đei mă oei jing tơmam tơmang lăng kăp gĭt. ‘Ngoăih kơ pơgar ‘long sa plei, tơring groi kông Khánh Hòa oei đei thong đak, chơ kơi đak kơtăh, bri kơdrơ̆ng pơm tơdrong ‘lơ̆ng hơiă vă hơtŏk tơiung tơmang lăng bri brăh tơpôl. Hơdai hăm tơdrong hơrih sa joh ayŏ joăt joe kơ kon pơlei Raglai, Êđê, Tày, Nùng, tơring gơh pơjing lơ tơmam tơmang lăng ‘lơ̆ng hơiă nhen et soi, lăng đe tôn chĭng chêng, tơmam sa kon kông, oei tơ̆ homestay tơ̆ hnam kơjung.

Mŏ Nguyễn Thị Thu tơ̆ Nha Trang lăng ƀôh ƀơ̆t truh tơ̆ xăh groi kông Khánh Sơn tơmang lăng: “Ŭnh hnam nhôn sơnăm ‘nâu năm tơ̆ Khánh Sơn ‘măng mă 2 bơih. Hơnih ‘noh ‘lơ̆ng, ‘năr rơngơp. Plei ‘long sơnăm ‘nâu rŏ lăng plei lơ, măng cụt, sầu riêng tŏk bŏk mơ̆t lơ̆m pơyan phĕ. ‘Ngoăih kơ sa plei ‘long, ŭnh hnam nhôn oei tŏk tơ̆ chơ kơi đak Tà Gụ, tơ̆ noh chơ kơi đak ‘lơ̆ng, rơngơp. ‘Long tih lơ, bri kơdrơ̆ng rơngơp. Kon pơlei tôch kơ hơlăng, pơvih pơvăn ‘lơ̆ng dêh.”

Ƀok Nguyễn Trí Dũng, Phŏ Kơdră Anih vei lăng kon pơlei xăh Tây Khánh Sơn roi tơbăt, lơ̆m tơring hlôi đei 1,2 ŭnh hnam tơplih tơdrong jang tĕch mơdro, tơmơ̆t jên jang pơvih pơvăn sŏng sa, chă tơmang lăng hnam pơgar vă pơyua ăn tơmoi tơmang lăng.

“Lơ̆m xăh Tây Khánh Sơn đei tơdrong ‘lơ̆ng ‘noh jĭ dôm bơngai jang pơgar tih, lơ̆m noh đei dôm hơnih ‘lơ̆ng, ‘năr rơngơp, pơm tơdrong hiôk ăn tơmoi năm lăng, sa tơmam sa ‘lơ̆ng kơ Khánh Sơn kŭm nhen tơmam sa rim tơring. Kiơ̆ đơ̆ng noh gô sơng đei tơmoi tơmang lăng, hơdai hăm ‘noh tơgop lơ̆m tĕch tơmam đơ̆ng choh jang sa ăn kon pơlei”.

Vă iŏk jang đei yua, dêh char Khánh Hòa kăl kơ proh hơmet tơring tơmang lăng tơpôl tơklep hăm choh jang sa, rơih tơmam tơm nhen sầu riêng Khánh Sơn, pơ ŏ Cam Lâm, krô̆i Diên Khánh. Kon pơlei đei pơtrŭt jang hơdai jing hơp tak xăh vă hơtŏk ‘lơ̆ng pơvih pơvăn. Dêh char kŭm kăl kơ tơmơ̆t jên jang pơm anih jang kăl, tơgŭm ming man  homestay, hơnih lăng vă kơbăt, hơdai hăm akŏm pơhrăm tơdrong gơh pơvih pơvăn, pơma tơroi, pơtho nơ̆r teh đak đe ăn kon pơlei. Gĭt kăl hloh ‘noh jĭ tơgoăt tour trong, pơjing tơdrong jang “đak dơsĭ achon đak dơsĭ Nha Trang – pơgar ‘long Khánh Sơn - joh ayŏ Khánh Vĩnh”, hơdai hăm roi tơƀôh lơ̆m kơmăy kơsô̆ păng kiơ̆ anih mơdro sa găh tơmang lăng vă sơng đei tơmoi tơmang lăng. Ƀok Nguyễn Duy Quang, Kơdră Anih vei lăng găh Choh jang sa păng Cham char dêh char Khánh Hòa roi tơbăt:

“Tơdăh rim tơring groi kông hrei ‘nâu pơm tơlĕch đei dôm kơloăi ‘long sa plei păng hơdai hăm tơmang lăng bri brăh ‘noh gô pơm jing 1 trong jang tơmang lăng vă hơtŏk tơiung tơdrong jang tơmang lăng kơ dêh char Khánh Hòa. Tơmang lăng bri brăh tơklep hăm jang pơgar să hăm tơmam OCOP gô hơtŏk ‘lơ̆ng tơdrong hơrih sa kon pơlei. Mưh tơmang lăng tơklep hơdai rim tơring đak dơsĭ tŏk truh tơring groi kông ‘noh gô đei dôm tơmam OCOP, pơlei tơdrong jang, pơgar să, pơm tơdrong hơiă ‘nao ăn hơtŏk tơiung tơmang lăng tơ̆ hơnăp kơnh”.

Hăm tơdrong ‘lơ̆ng cham char lơ, pơgar ‘long plei hơ krĭu hơkrăo păng joh ayŏ ‘lơ̆ng hơiă, Khánh Hòa tŏk bŏk dơ̆ng hơnăp tơdrong hiôk vă pơm ‘nao um rup tơmang lăng, ưh khan lăp gơ̆t jơ̆ng tơmoi hăm đak dơsĭ achon đak dơsĭ mă oei hăm dôm tơmang lăng rơgoh, tơ jê̆ păng pha ra. Tơmang lăng tơpôl tơdăh đei proh hơmet ‘lơ̆ng, hơtŏk tơiung kơjăp gô jing tơnang ‘măng ba tơmoi tơmang lăng ƀơm truh trong jrŭ joh ayŏ păng cham char Khánh Hòa, pơm tơdrong ‘lơ̆ng ‘nao ăn mŭk drăm tơring.