Pôk ăn Hla bơar tơchơ̆t păng iung pơma tơ̆ pơm lêh, Tổng Bí thư, Kơdră chĕp pơgơ̆r Teh đak hmach chơt hơ iă ăn ƀar ‘nu kang ƀô̆ ‘nao đei Hơnih tơm Chinh trĭ pơjao, pôk tơmơ̆t, pơjao tơdrong jang ‘nao: Ƀok Trần Lưu Quang iŏk jang Kơdră Hơnih jang Mŭk drăm Trung ương păng ƀok Mai Văn Chính iŏk jang Kơdră Hơnih jang Pơrô̆ pơrôp Trung ương. Tổng Bí thư, Kơdră chĕp pơgơ̆r Teh đak Tô Lâm pơma hơdăh, ƀok Trần Lưu Quang hăm ƀok Mai Văn Chính jĭ kang ƀô̆ chĕp pơgơ̆r đei pơtho pơhrăm jrŭ, atŏk tơ iung đơ̆ng tơring, iŏk jang lơ tơdrong jang, vang iung jang lơ̆m lơ jăl jang Trung ương, bơ̆ jang ‘lơ̆ng lơ̆m rim tơdrong jang păng băt hlôh ƀôh hơdăh lơ̆m bơ̆ jang pơchoh trong, chĕp pơgơ̆r, pơrô̆ jang, iŏk đei jơnei hơ iă lơ̆m rim tơdrong jang đei pơjao jang. Iung pơma đơ̆ng rŏng sơng iŏk hla bơar tơchơ̆t, ƀok Trần Lưu Quang hăm ƀok Mai Văn Chính sơkơ̆t hơdăh, ‘nou jĭ tơdrong chơt hiôk păng jei hơnăp jang kăl pơm lơ liơ vă atŭm hăm rim kơdră jang lơ̆m Hơnih jang iung jang keh đang tơdrong jang đei pơjao tôch kơ lơ tơ̆ hơnăp Pơm lêh hop akŏm mă XIV kơ Đảng. Ƀok Trần Lưu Quang hăm ƀok Mai Văn Chính ‘meh vă, hăm kơchư̆k ‘nao ‘noh Kơdră Hơnih jang Mŭk drăm Trung ương păng Kơdră Hơnih jang Pơrô̆ pơrôp Trung ương gô hơnơ̆ng đei Đảng, Teh đak, kơdră chĕp pơgơ̆r păng kang ƀô̆ đảng viên rim hơnih jang Trung ương lăng ba, tơgŭm djru, jang hơdoi kơjăp vă atŭm hăm rim kơdră lơ̆m Hơnih jang bơ̆ jang keh đang tơdrong jang lơ̆m kơ chư̆k ‘nao.