Tổng Bí thư, Kơdră chĕp pơgơ̆r Teh đak Tô Lâm pơma hơdăh, tơdrong hơmet pơ ‘lơ̆ng đơ̆ng kial hơbut Yagi pơrăm ‘noh tơdrong jang iung jang kơtang lơ̆m giĕng ou păng pơđĭ khul chinh trĭ, kăl lăng kơtang hloh dơ̆ng. Hơnih tơm Chinh trĭ, Ban Bí thư tơbăt jơhngơ̆m vang ‘mêm mơnat ăn rim hơnih bơ̆ jang, tơring, rim ŭnh hnam păng kon pơlei hiong răm đơ̆ng kial hơbŭt pơm ăn, adoi hôn bơnê Khul kơdră chĕp pơgơ̆r Teh đak, Thủ tướng Teh đak, Khul ƀô̆ đô̆i, Kŏng ang, rim hơnih bơ̆ jang hlôi iung jang kơtang tang găn hrôih đơ̆ng hơtăih kial hơbut kơsô̆ 3. Pơma truh dôm trong kăl iung jang hloi, Tổng Bí thư, Kơdră chĕp pơgơ̆r Teh đak Tô Lâm athei rim hơnih bơ̆ jang hơnơ̆ng akŏm tơlĕch jang kơtang hơmet pơ ‘lơ̆ng đơ̆ng ‘mi kial hơbŭt pơrăm. Lơ̆m ou, hơnơ̆ng tơlĕch ăn rim khul iung jang tơgŭm dŏng dôm kon pơlei mă dang ei tŏk bŏk đom, hiong dong, iŏk yua gre kmăi kmŏk hơgei hloh vă yak truh hăm rim tơring mă dang ei ưh kơ gơ̆h chă yak tơ̆ ou tơ̆ to kơ yuơ đak lip pơm ăn.