Lơ̆m prăt dôm sơnăm ou ki, tơgoăt tơgoăl chinh trĭ, tơbôl joăt joe, tơgoăt tơgoăl đei atŏk tơ iung ‘lơ̆ng hơ iă, tơbăt hơdăh kiơ̆ lơ ‘măng năm ngôi dih băl kơdră kơpal, ‘măng tơƀơ̆p pơma dơnuh dih băl kơdră kơpal ƀar teh đak. Ƀar teh đak hlôi kĭ lơ tơdrong tơdrong tơchơ̆t, drơ̆ng minh nơ̆r jang hơdoi lơ̆m rim tơdrong jang chinh trĭ, tơbôl, muk drăm, mơdro sa, tơmơt jên jang, choh jang sa, ka hơdang, khoa hŏk-kmăi kmŏk, viễn thông, jang pơgang, pơtho pơhrăm, joh ayŏ, sơđơ̆ng teh đak , jên hu, hơnih mong jên, jang hơdoi dêh char ... pơjing rơvơn ăn rim hơnih tơm, hơnih jang pơih să jang hơdoi. Lăp đơ̆ng rŏng pơm lêh sơng, Tổng Bí thư, Kơdră chĕp pơgơ̆r Teh đak Tô Lâm hăm ƀok Kơdră tơm Mozambique đei tơƀơ̆p pơma dơnuh dih băl păng đơ̆ng rŏng ‘noh chep kơ̆l Khul kơdră kơpal ƀar teh đak pơma đam, lăng hơlen pơtôch jang hơdoi ƀar teh đak lơ̆m khei năr ou ki păng tơlĕch rim trong jang hơdoi lơ̆m khei năr kơnh.