Tơ̆ tơƀơ̆p, Tổng Bí thư, Kơdră chĕp pơgơ̆r Teh đak Tô Lâm pơma tơbăt jơhngơ̆m đon bơnê kơ Ƀok kơdră tơm Mi Joe Biden găh pơtruh nơ̆r vang ơh sơ-‘ngon kơtang tơ̆ hơnăp tơdrong hiong răm kơ Tổng Bí thư Nguyễn Phú Trọng, adoi bơnê tơdrong tơgum djru tơtom đơ̆ng Khul kơdră Teh đak Mi ‘măn ăn kon pơlei Việt Nam lơ̆m ‘măng kial hơbŭt Yagi pơrăm ou ki. Ƀar ‘nu Kơdră chĕp pơgơ̆r jei tơbăt jơhngơ̆m đon chơt hơ iă tơ̆ hơnăp dôm tơdrong iŏk đei jơnei hơ iă đơ̆ng rŏng mĭnh sơnăm tơlĕch jang kiơ̆ Tơgoăt tơgoăl Jang hơdoi tôm tong, trŏ lăp hăm ‘meh vă păng đei iŏk yua pơđĭ ƀar păh, tơgop vei kơjăp rơngei hiôk hian, sơđơ̆ng, jang hơdoi, atŏk tơ iung kơ tơring păng lơ̆m apŭng plĕnh teh. Găh tơdrong apŭng plĕnh teh păng tơring mă ƀar păh lăng truh, ƀar ‘nu kơdră chĕp pơgơ̆r drơ̆ng mĭnh nơ̆r ƀar păh hơnơ̆ng atŏk kơtang jang hơdoi tơ̆ rim ‘măng hop akŏm lơ̆m tơring păng apung plĕnh teh, lơ̆m ou đei tơdrong jang hơdoi ASEAN, Jang hơdoi Mekong-Mi, APEC, Liên hợp quốc…tơgop lơ̆m pơtrŭt kơtang pơma dơnuh, rơngei hiôk hian, sơđơ̆ng păng atŏk tơ iung lơ̆m tơring păng apŭng plĕnh teh.