‘Nâu jĭ 1 lơ̆m dôm Hnam trưng Đăi hŏk đunh đai păng đei ư hơnhang hlŏh lơ̆m apŭng plenh teh. Tổng Bí thư, Kơdră teh đak chơt hơiă đei băt, Hnam trưng Đăi hŏk Trinity Dublin oei tơlĕch lơ trong jang hơdoi hăm dôm hnam trưng đăi hŏk, anih tơchĕng hơlen kơ Việt Nam. Kơhrĕng ‘nu bơngai pơtho, sinh viên Việt Nam hlôi păng tŏk bŏk truh hăm tơdrong hŏk pơhrăm păng tơchĕng hơlen tôch rơgei lơ̆m apŭng plenh teh tơ̆ hnam trưng.

Tổng Bí thư, Kơdră teh đak bơ̆n hơpơi ‘mĕh, dôm tơdrong jang hơdoi âu gô iŏk đei lơ tơdrong ‘lơ̆ng hlŏh dơ̆ng, vang tơgop bơ̆ jang đei dôm tơdrong ‘mĕh jang tŏk đunh đai đơ̆ng 2 teh đak păng hơnhăk tơdrong pơvei Việt Nam - Ai-len tŏk roi đunh roi ‘lơ̆ng păng roi đei yoa. Tổng Bí thư, Kơdră teh đak lui, Việt Nam păng Ai-len gô hơnơ̆ng năm hơdai, vang jang hơdoi kơjăp ‘lơ̆ng, pơm hơtŏk hlŏh dơ̆ng tơdrong pơvei ning mônh kơnh, yoa tơdrong đei yoa đơ̆ng kon pơlei 2 teh đak, yoa 1 tơdrong arih ning mônh kơnh rơngei hiôk hian, sơđơ̆ng ‘lơ̆ng, jang hơdoi păng atŏk tơiung tơ̆ 2 tơring păng lơ̆m apŭng plenh teh.