Pơgê 26/9 (kiơ̆ jơ Hà Nội), Tổng Bí thư, Kơdră teh đak bơ̆n, ƀok Tô Lâm păng hơkăp ƀok kŭm hăm Khul tang măt ăn teh đak bơ̆n hlôi truh tơ̆ cham gre păr Jose Marti tơ̆ anih tơm La Habana, pơtơm năm tơmang lăng tơ̆ teh đak Cuba kiơ̆ nơ̆r krao đơ̆ng Bí thư mă Mônh Khul kơdră chĕp kơ̆l Trung ương Đảng Cộng sản Cuba, Kơdră teh đak Cuba Miguel Diaz Canel Bermudez păng hơkăn ƀok.

Đei pơgơ̆r ƀât mă 2 teh đak oei vă tơbăt 65 sơnăm năr pơjing tơdrong pơvei jang tơbôl (2/12/1960-2/12/2025), ‘măng năm tơmang lăng tơƀôh hơdăh tơdrong pơvei mĭnh ƀơ̆r đon, jang hơdoi ‘lơ̆ng hơiă đơ̆ng sơ̆ tôch kăp gĭt đơ̆ng Việt Nam-Cuba, hơnơ̆ng đei năng jĭ tơmam kăp gĭt hlŏh đei Đảng, Teh đak păng kon pơlei 2 teh đak akŏm đĭ jơhngâm tơiung pơjing, atŭm hăm ‘nŏh tơƀôh hơdăh đon năng kăl đơ̆ng Việt Nam hăm teh đak Cuba păng anih dơ̆ng đơ̆ng teh đak Cuba lơ̆m trong jang tơbôl kơ teh đak Việt Nam.

Tơchĕng adrol lơ̆m ‘măng năm tơmang lăng, Tổng Bí thư, Kơdră teh đak bơ̆n ƀok Tô Lâm vă truh pơm lêh sơng; đei dôm ‘măng pơma đam, pơma nuh hăm dôm ƀok Kơdră chĕp kơ̆l teh đak Cuba; plang pơkao ƀât Rup man Ƀok Hô păng Bơngai tơblăh kơtang nuih mưng kơ teh đak Cuba Jose Martí, năm ngôi tơ̆ 1,2 anih jang mŭk drăm, lơ̆m noh đei lơ anih đei tơdrong jang hơdoi păng jên jang đơ̆ng dôm anih tĕch mơdro kơ Việt Nam; tơƀâp bôl boăl păng jơhnơr mơlôh kơ 2 teh đak.