Tơ̆ jơ sơng, Tổng Bí thư, Kơdră teh đak Tô Lâm pơma hơdăh, hrei ‘nâu, Việt Nam đĭ jing 1 lơ̆m 40 teh đak jang mŭk drăm tih hlŏh lơ̆m apŭng plenh teh, đei lơ̆m grŭp 20 teh đak jang mŭk drăm, tĕch mơdro tih lơ̆m apŭng plenh teh, dơ̆ng mă 32 lơ̆m grŭp 100 kơjă hơnăn tơmam teh đak pran ‘lơ̆ng lơ̆m apŭng plenh teh. 

Tổng Bí thư, Kơdră teh đak Tô Lâm pơma hơdăh, tơ̆ hơnăp kơnh, Việt Nam akŏm jơhngâm tưk tơiung, kơchăng jang hơdoi hăm apŭng năm truh tơdrong jang mŭk drăm hăm kơmăy sô̆, jang tŏk rơgŏh ‘lơ̆ng, atŏk tơiung khoa hŏk kơmăy kơmŏk, tơplih ‘nao rơgei vă mât jang hơdoi jrŭ xă, vang jang đei yoa ‘lơ̆ng ƀiơ̆ lơ̆m trong pơtruh tơmam jơ̆p plei teh. Atŭm hăm ‘nŏh, hơtŏk tơdrong tơmât jên jang pơm hơmet anih jang, trong nơnăm gĭt kăl, dôm tơdrong jang tih kăp gĭt, hơtŏk hrĕnh tơdrong hơmet ming trong jang xa, jơhngâm pran, đon kơchăng kơdih tơ̆ anih jang mŭk drăm, hơnơ̆ng hơmet pơ ‘lơ̆ng, pơjing anih tơmât jên jang xa, tĕch mơdro hiôk hian hlŏh ăn dôm anih jang xa.