Tơ̆ jơ tơƀâp Kơdră tơm teh đak Bungari, Tổng Bí thư, Kơdră teh đak bơ̆n, ƀok Tô Lâm pơma hơdăh, Việt Nam ling lang năng kăl păng hơpơi ‘mĕh pơm hơtŏk hlŏh dơ̆ng tơdrong pơvei jang hơdoi lơ tơdrong hăm teh đak Bungari; pơma hơdăh, Việt Nam hơnơ̆ng năng kăl păng chih răk tơdrong tơgŭm đơ̆ng kon pơlei Bungari hăm Việt Nam lơ̆m tơdrong tơblăh iŏk rơngei adrol sơ̆ păng tơiung pơjing teh đak hrei ‘nâu.

Tơƀâp Kơdră tơm teh đak Phần Lan Alexander Stubb, Tổng Bí thư, Kơdră teh đak bơ̆n bơnê kơ Khul kơdră teh đak păng kon pơlei Phần Lan hlôi tơgŭm ăn Việt Nam lơ̆m khei ‘năr pơma tat adrol sơ̆ păng jang dar dĕh jang tŏk, kŭm nhen đei nơ̆r jet gia pơma nuh, pơlung kon pơlei Việt Nam hơmet pơ ‘lơ̆ng hiong răm đơ̆ng kial kơsô̆ 3 âu ki. Tơ̆ jơ tơƀâp hăm Kon ƀok pơtao Kuwait Sheikh Sabah Al-Khaled Al-Sabah, Tổng Bí thư, Kơdră teh đak bơ̆n, ƀok Tô Lâm athei 2 păh hơnơ̆ng pơgơ̆r tơƀâp, pơma nuh ăn khul jang tih păng rim khul grŭp, tơlĕch jang đei yoa ‘lơ̆ng dôm trong jang hơdoi. Việt Nam ‘mĕh sơng dôm anih tĕch mơdro đơ̆ng Kuwait truh tơmât jên jang xa tơ̆ teh đak Việt Nam.