Dôm sơnăm âu ki, tơdrong pơvei Việt Nam - Lào roi ‘năr roi đei hơmet ming, hơtŏk tơiung jrŭ să, ‘lơ̆ng păng đei yua lơ̆m đĭ đăng dôm tơdrong jang. Kiơ̆ đơ̆ng noh tơgop gĭt kăl lơ̆m tơdrong vei lăng sơđơ̆ng chĭnh trĭ, hơtŏk tơiung mŭk drăm - tơpôl, vei sơđơ̆ng tơ̆ 2 teh đak, hơtŏk anih dơ̆ng kơ 2 Đảng, 2 teh đak.

‘Măng năm ngôi tơ̆ Việt Nam đơ̆ng Tổng Bí thư, Kơdră teh đak Lào Thongloun Sisoulith păng hơkăn sư ‘noh jĭ ‘măng vă kơdră chĕp kơ̆l 2 păh roi tơbăt ăn băl găh tơdrong 2 Đảng, 2 teh đak. Pơma dơnuh găh tơdrong tơring păng apŭng plĕnh teh vang bơngơ̆t truh; hơlen lăng iŏk yua jang hơdai 2 pang khei ‘năr âu ki păng tơlĕch ăn trong vă jang, hơtŏk ‘lơ̆ng đei yua jang hơdai tơ̆ hơnăp kơnh.