Lơ̆m kơthơ, Tổng Bí thư gơih truh đe mon păh iung, hơioh Việt Nam lơ̆m teh đak păng tơ̆ teh đak đe, đe mon teh đak đe tơ̆ Việt Nam dôm tơdrong ‘mêm, hiôk hloh lơ̆m năr Tết Trung thu, Tết kơ đe hơioh. Păng ‘meh vă rim Tết Trung thu gô jing dôm tơdrong ƀlŏk ‘lơ̆ng đơ̆ng đe hơioh.

Tổng Bí thư kŭm gơih nơ̆r vang tơgŭm mơmat tat hăm hơioh tơring đak lơ̆p: “Trung thu sơnăm ‘nâu ưh kơ đei tôm yua đơ̆ng ‘mi kial pơm ăn dôm tơdrong hiong răm kơtang hăm lơ ŭnh hnam, pơlei pơla, phường xăh. Lơ mon hơioh ưh kơ pŭn đei lôch răm, lơ mon hiong mĕ ƀă, yă ƀok, ‘nhŏng oh, hiong hnam oei, hơrih tôch kơ mơmat tat. Ĭnh apĭnh gơih nơ̆r vang sơ ‘ngon gĭt kăl hloh truh ŭnh hnam đe mon ‘noh jĭ bơngai răm đơ̆ng ‘mi kial hơbŭt păng hơmĕng đĭ đăng bơ̆n athei nuih mơng yak hloh ơh sơ ‘ngon, hiong răm âu. Hăm đe mon tơ̆ dôm tơring ‘mi kial đak lơ̆p, Ĭnh pơkă kơ đe mon ling lang lăng truh tơdrong sơđơ̆ng mưh hŏk pơhrăm, ngôi pơchơt. Athei veh hơtăih dôm hơnih krê hơmơt, ưh kơ pơngôi hơnul jê̆ đak krong, đak glung, dơnâu đak, ling lang ƀlŏk nơ̆r mĕ ƀă, thây kô pơtho vă chă vei lăng kơdih păng bôl buăl”.