Kơdră Quốc hội Amarbayasgalan hôn bơnê ‘măng năm ngôi tơ̆ Mông Cổ đơ̆ng Tổng Bí thư, Kơdră teh đak Tô Lâm; lui ngeh ‘măng năm ngôi gô tơgop hơtŏk loi dơ̆ng jang hơdai pơm ‘lơ̆ng hloh dơ̆ng tơdrong pơvei “Jang hơdai tôm tơdrong Việt Nam - Mông Cổ”; pơma hơdăh ‘nâu gô jing tơdrong vă pơtrŭt hơtŏk tơiung tôm tơdrong rim tơdrong jang hơdai đơ̆ng 2 teh đak tơ̆ hơnăp kơnh. 2 păh lăng ‘lơ̆ng tơdrong pơvei jang hơdai, tơƀơ̆p pơma dơnuh đơ̆ng Quốc hội 2 teh đak tŏk bŏk hơtŏk tơiung hrĕnh păng roi ‘năr roi ‘lơ̆ng hơiă.

2 păh drơ̆ng nơ̆r hơnơ̆ng tơlĕch jang đei yua, tôm tơdrong drơ̆ng nơ̆r jang hơdai hlôi kĭ đơ̆ng Quốc hội 2 teh đak sơnăm 2018; drơ̆ng nơ̆r hơtŏk loi dơ̆ng hơnăp jang anih jang pơjing khôi luơ̆t 2 teh đak lơ̆m tơdrong jang hơdai tơgŭm pơtrŭt tơklep hơdai 2 mŭk drăm hơtŏk tơiung tơpă, đei yua păng tôm tơdrong, lăp hăm tơdrong pơvei Jang hơdai tôm tơdrong; hơdrin pơtrŭt pơgơ̆r păng krao hơvơn dôm anih mơdro sa 2 teh đak vang jang dôm tơdrong jang pơtrŭt mơdro sa.