Tổng Bí thư Nguyễn Phú Trọng pơma hơdăh: “Lơ̆m rim chăl arih, tơ̆ rim tĕh đak, khul bơngai hŏk jrŭ ling lang jing mĭnh khul tôch gĭt kăl vă tưk tơiung tơdrong jang tŏk đơ̆ng tơpôl”.

Tổng Bí thư athei, rim khul jang khoa hŏk păng kơmăy kơmŏk, khul bơngai hŏk jrŭ lơ̆m tĕh đak bơ̆n, mă loi jĭ bơngai hŏk jrŭ, dôm bơngai jang khoa hŏk găh Grŭp dôm khul jang Khoa hŏk păng ki thuơ̆t Việt Nam athei adrin hlŏh dơ̆ng, đei lơ tơdrong tơgop tih hlŏh dơ̆ng, đei yoa hlŏh dơ̆ng ăn tơdrong jang tơiung pơjing, jang tŏk hrĕnh păng pran kơjăp kơ tĕh đak. 

Tổng Bí thư Nguyễn Phú Trọng oei athei, hơtŏk tơdrong hơmet kơjăp khul grŭp, hơtŏk tơdrong đei yoa mưh bơ̆ jang đơ̆ng Grŭp dôm khul jang Khoa hŏk păng ki thuơ̆t Việt Nam đơ̆ng Trung ương truh tơ̆ tơring; vang roi tơƀôh pơjing trong pơgơ̆r, tơdrong tơgŭm, pơm hiôk hian ăn khul bơngai hŏk jrŭ bơ̆ jang vang tơgop ăn tơdrong jang tŏk kơ tĕh đak.