Anih tơm Chinh trĭ hlôi pơma nuh păng akhan, lơ̆m hlŏh 35 sơnăm tơplih ‘nao, mă loi lơ̆m 10 sơnăm bơ̆ jang kiơ̆ tơdrong tơchơ̆t Trung ương 5 jăl XI, tơplih ‘nao păng atŏk tơiung tơdrong tơgŭm tơpôl ‘nŏh jĭ trong jang hơnơ̆ng păng ưh đei tơplih đơ̆ng Đảng, tĕh đak bơ̆n hăm jơhngâm đon jang tŏk mŭk drăm năm hơdoi hăm bơ̆ jang gơ̆h hơgei păng hơtŏ băl lơ̆m tơpôl.

Tơdrong bơ̆ jang đei yoa dôm tơdrong tơ gŭm lơ̆m tơpôl, vei lăng ‘lơ̆ng tơdrong arih xa tơpôl vang tơgop hơmet kơjăp đon lui đơ̆ng Kon pơlei hăm Đảng, tĕh đak păng chăl chĕp kơ̆l pơgơ̆r. Anih tơm Chinh trĭ pơma hơdăh, tơdrong hơnơ̆ng tơplih ‘nao, tưk hơtŏk tơdrong đei yoa đơ̆ng tơdrong tơgŭm tơpôl ‘nŏh jĭ tơdrong jang đunh đai gĭt kăl păng hơnơ̆ng đơ̆ng Đảng, tĕh đak, đơ̆ng rim anih jang chinh trĭ păng đĭ đăng tơpôl, vang tơgop jang kiơ̆ ‘lơ̆ng trong jang xã hội chủ nghĩa, bơ̆ jang tŏk mŭk drăm năm hơdoi hăm tơdrong gơ̆h hơgei, hơtŏ băl lơ̆m tơpôl, vei lăng ‘lơ̆ng tơdrong arih xa tơpôl.